မလေးရှား နိုင်ငံရေး ရှုပ်ရှုပ်ထွေးထွေး (၂)

မလေးရှားဝန်ကြီးချုပ် နေရာအတွက် မဟာသီယာ နဲ့ အန်ဝါ ကြားလွန်ဆွဲပွဲကနေ ရှုပ်ထွေးလာတဲ့ မလေးရှားနိုင်ငံရေးဟာ နောက်ထပ် အလှည့်အပြောင်းတစ်ခုနဲ့ ကြုံခဲ့ပြန်ပါပြီ။

ဖေဖော်ဝါရီ ၂၄ ရက်နေ့ မဟာသီယာ ဝန်ကြီးချုပ်အဖြစ်က နှုတ်ထွက်ပြီးတဲ့နောက်မှာ မလေးရှား ဘုရင်က ု ဖေဖော်ဝါရီလ ၂၅ ၊ ၂၆ ရက်နေ့တွေမှာ လွှတ်တော်အမတ် ၂၂၂ ယောက်ကို တစ်ဦး ချင်းခေါ်တွေ့ခဲ့တယ်။ ဘုရင်က အမတ်တွေကို ဝန်ကြီးချုပ်နေရာအတွက် မဟာသီယာ ကို ထောက်ခံသလား၊ အန်ဝါကို ထောက်ခံသလား၊ ဒါမှမဟုတ် လွှတ်တော်ကို ဖျက်သိမ်းပြီး ရွေးကောက်ပွဲအသစ် လုပ်တာလိုချင်သလားလို့ မေးခဲ့တယ်လို့ဆိုတယ်။

အဲဒီအချိန်မှာ မဟာသီယာရော၊အန်ဝါ နှစ်ယောက်လုံးက သူတို့ကို ဝန်ကြီးချုပ်အဖြစ် ထောက်ခံ မယ့် အမတ်အရေအတွက်ရှိတယ်လို့ပြောခဲ့ကြပေမယ့် ဘုရင်ကတော့ ဘယ်သူမှ ဝန်ကြီးချုပ် ဖြစ် ဖို့အတွက် လုံလောက်တဲ့ထောက်ခံမှုမရဘူးလို့ ပြောခဲ့တယ်။ ဒါ့အပြင် ဝန်ကြိးချုပ် အဖြစ် ဘယ်သူ့ကို တာဝန်ပေးမလဲဆိုတာ သူဆုံးဖြတ်မှာမဟုတ်ဘူး။ လွှတ်တော်ကပဲ ဆုံးဖြတ်ရလိမ့်မယ် လို့ လည်း ဆိုတယ်။ အဲဒီအချိန်မှာ အတိုက်အခံပါတီကြီးနှစ်ခုဖြစ်တဲ့ UMNO နဲ့ PAS ကတော့ ပါတီခေါင်းဆောင်တွေအစည်းအဝေးလုပ်ပြီး ရွေးကောက်ပွဲအသစ် လုပ်နိုင်တဲ့အခြေအနေတွေကို ဆွေးနွေးခဲ့တယ်။

ဘုရင်က ဝန်ကြီးချုပ်နေရာအတွက် လွှတ်တော်ကပဲ ဆုံးဖြတ်လိမ့်မယ်လို့ပြောပြီးတဲ့အချိန်မှာ တော့ ဖေဖော်ဝါရီလ ၂၇ ရက်နေ့မှာ မဟာသီယာက မတ်လ ၂ ရက်နေ့ လွှတ်တော် အစည်း အဝေးခေါ်ပြီး မဲခွဲမယ်လို့ ကြေညာခဲ့တယ်။

ဒါပေမယ့် ဖေဖော်ဝါရီလ ၂၈ ရက်နေ့မှာတော့ မလေးစော်ဘွားကောင်စီအစည်းအဝေးလုပ်ခဲ့ပြီး နိုင်ငံရေးအကျပ်အတည်းကိစ္စကို ဆွေးနွေးခဲ့ကြတယ်။ ( မလေးဘုရင်ကို စော်ဘွား ကိုးယောက် ထဲက နေ အလှည့်ကျရွေးပြီး ငါးနှစ်သက်တမ်းတာဝန်ယူရတာဖြစ်ပါတယ်။ ) အဲဒီနေ့မှာပဲ လွှတ် တော်ဥက္ကဋ္ဌက ယာယီဝန်ကြီးချုပ်မဟာသီယာကို မတ်လ ၂ ရက်နေ့မှာ လွှတ်တော်ခေါ်ယူ ဖို့မဖြစ်နိုင်ဘူးလို့အကြောင်းပြန်ခဲ့တယ်။

အဲဒီအချိန်မှာပဲ မဟာသီယာ ဥက္ကဋ္ဌလုပ်ခဲ့တဲ့ Bersatu ပါတီက သူတို့အနေနဲ့ လက်ရှိ ပါတီ ဥက္ကဋ္ဌ Muhyiddin Yassin ကို ဝန်ကြီးချုပ်တာဝန်ပေးဖို့ ဘုရင်ကို တင်ပြခဲ့တယ်။ UMNO နဲ့ PAS ပါတီ ကလည်း ထောက်ခံခဲ့တယ်။ အန်ဝါရဲ့ပါတီကနေ ခွဲထွက်လာတဲ့ အုပ်စုကလည်း ထောက်ခံတယ်။

လက်ရှိလွှတ်တော်မှာ Bersatu ပါတီက ၂၆ နေရာ၊ UMNO က ၄၈ နေရာ၊ PAS က ၁၂ နေရာ နဲ့ ဝန်ကြီး အစ်ဇ်မင်းခေါင်းဆောင်တဲ့ PKR ခွဲထွက်အဖွဲ့က လွှတ်တော် အမတ် ၁၀ နေရာရှိတဲ့ အတွက် ၉ ၆ မဲရတယ်။ ဒါပေမယ့် အစိုးရဖွဲ့ဖို့အတွက်လိုအပ်တဲ့ မဲက ၁၁၂ မဲဖြစ်နေတယ်။ Bersatu ကတော့ အမတ်နေရာ ၁၈ နေရာရှိတဲ့ GPS ပါတီကလည်း သူတို့ကို ထောက်ခံတဲ့ အတွက် ထောက်ခံမဲ ၁၁၄ မဲရပြီလို့ပြောခဲ့တယ်။

ဖေဖော်ဝါရီလ ၂၉ ရက်နေ့မှာတော့ အန်ဝါခေါင်းဆောင်တဲ့ လက်ကျန် PH ညွှန့်ပေါင်းအဖွဲ့က မဟာသီယာကိုပဲ ဝန်ကြီးချုပ်အဖြစ်ထောက်ခံတော့မယ်လို့ သဘောထားပြောင်းပြီးကြေညာ ခဲ့တယ်။ အန်ဝါကတော့ သူ ဝန်ကြီးချုပ်မဖြစ်နိုင်ရင် UMNO ပါတီ ပါဝင်တဲ့ ညွှန့်ပေါင်းအစိုးရ ဖြစ် တာကိုတော့ လက်မခံဘူး၊ မဟာသီယာဝန်ကြီးချုပ်ဖြစ်တာကတော်သေးတယ်လို့ ယူဆခဲ့ပုံရ တယ်။ ဒါပေမယ့် PH ညွှန့်ပေါင်းက လွှတ်တော်ထဲမှာ အမတ် ၉ ၂ ပဲ ရှိတဲ့အတွက် ကျန်တဲ့ ပါတီ တွေထောက်ခံမှုမရဘဲ အစိုးရဖွဲ့ဖို့အတော်ခက်တယ်။

အဲဒီနေ့ မနက်ဆယ်နာရီမှာပဲ Bersatu, UMNO , PAS ပါတီခေါင်းဆောင်သုံးယောက်ဟာ ဘုရင် ကို သွားရောက်တွေ့ဆုံတင်ပြခဲ့တယ်။ နေ့လယ် တစ်နာရီကျော်မှာတော့ အန်ဝါက ဘုရင်ကို သွား ရောက်တွေ့ဆုံပြီး PH ညွှန့်ပေါင်းအဖွဲ့အနေနဲ့ မဟာသီယာကို ပြောင်းလဲထောက်ခ ံပါ ကြောင်းတင်ပြခဲ့ပါတယ်။ ( ဖေဖော်ဝါရီ ၂၅၊ ၂၆ ရက်နေ့ ဘုရင်က ခေါ်ယူမေးမြန်းချိန်မှာ PH အမတ် ၉ ၂ ယောက်လုံးက အန်ဝါကို ဝန်ကြီးချုပ်အဖြစ်ထောက်ခံကြောင်းတင်ပြခဲ့တာပါ။ )

အဲဒီ ညနေ လေးနာရီ ခွဲအချိန်မှာတော့ မလေးရှားဘုရင်က Bersatu ပါတီဥက္ကဋ္ဌ Muhyiddin Yassin ကို ဝန်ကြီးချုပ်တာဝန်ပေးဖို့ ဆုံးဖြတ်ကြောင်းကြေညာခဲ့တယ်။

ဒီကြေညာချက်က မဟာသီယာကိုရော၊ အန်ဝါကိုရော အငိုက်မိသွားစေတယ်။ မဟာသီယာက သူ့အနေနဲ့ ဘုရင်ကို ဘာမှ တင်ပြခွင့်မရခဲ့ပဲနဲ့ ဘုရင်က ဝန်ကြီးချုပ်နေရာအတွက် ဆုံးဖြတ်ခဲ့တယ်လို့ ပြောခဲ့တယ်။ ရွေးကောက်ပွဲမှာ အနိုင်ရသူက အတိုက်အခံ ဖြစ်သွားပြီး ရွေး ကောက်ပွဲ ရှုံးသူတွေက အစိုးရဖြစ်သွားတာဟာလည်း အလွန်ထူးဆန်းတယ် လို့ ပြောတယ်။

မဟာသီယာက မတ်လ ၉ ရက်နေ့မှာ လွှတ်တော်အစည်းအဝေးကျင်းပတဲ့အခါ အမတ်တွေက ဘယ်သူ့ကို ဝန်ကြီးချုပ်အဖြစ်ထောက်ခံသလဲဆိုတာ ကွဲကွဲပြားပြားသိရမှာပဲလို့လည်း ပြောခဲ့ တယ်။ သူ့အနေနဲ့ကတော့ သူ့ပါတီဟောင်း Bersatu က အမတ်တစ်ချို့က ဘက်ပြောင်းလာ မယ်လို့မေ ျှာ်လင့်ထားပုံပဲ။

လောလောဆယ်ဆယ်တော့ ဝန်ကြီးချုပ်အသစ် Muhyiddin Yassin က မတ်လ ၁ ရက်နေ့မှာ ကတိသစ္စာပြုပြီး ဒီနေ့ မတ်လ ၂ ရက်နေ့မှာ စတင်တာဝန်ထမ်းဆောင်နေပြီ။

မတ်လ ၉ ရက်နေ့မှာ လွှတ်တော်အစည်းအဝေးမှာ ဘာဖြစ်မလဲဆိုတာစောင့်ကြည့်ရမှာပဲ။ ဒါ ပေမယ့် လွှတ်တော်ဥက္ကဋ္ဌကတော့ လွှတ်တော်အစည်းအဝေးခေါ်ဖို့ အတွက် ဝန်ကြီးချုပ်နဲ့ ညှိ ရ ဦးမယ်၊ ၉ ရက်နေ့ လုပ်ဖြစ်၊ မဖြစ် မသေချာသေးဖူးလို့ ဆိုတယ်။ ဝန်ကြီးချုပ်အသစ်ဘက်က ကြည့်ရင်တော့ ညွန့်ပေါင်းအဖွဲ့ပါတီတွေကြားမှာ ဝန်ကြီးနေရာတွေ ခွဲဝေရဦးမယ်၊ မဟာသီယာဘက်ကို ဘက်မပြောင်းသွားအောင် အပေးအယူတွေလုပ်ရဦးမယ်ဆိုတော့ မတ်လ ၉ ရက်နေ့မှာ လွှတ်တော်အစည်းအဝေးလုပ်ဖို့ စိတ်ပါမယ်မထင်ဘူး။

မလေးနိုင်ငံရေး အရှုပ်အထွေးကတော့ ရှင်းလေရှုပ်လေဖြစ်နေဆဲပါပဲ။