တိုက်ပွဲဝင် ရန်ကုန်

သင်္ကြန်ရုံးပိတ်ရက်တွေ ကုန်ဆုံးသွားတော့ ရန်ကုန်ကို Lockdown လုပ်သင့် ၊မလုပ်သင့် ဆွေးနွေး မှုတွေ ပေါ်လာတယ်။ ဗိုင်းရပ်စ်စစ်ပွဲမှာ ရှေ့တန်းစစ်မြေပြင်ဖြစ်နေတဲ့ ရန်ကုန် ဘာလုပ်မလဲ

ရပ်လို့မရ

ရန်ကုန်ဟာ ရပ်လို့မရဘူး။ ဘာ့ကြောင့်လဲဆိုတော့

၁။ ရန်ကုန်ဟာ မြန်မာနိုင်ငံစီးပွားရေးရဲ့ အဓိက မောင်းနှင်အားဖြစ်တယ်။

၂။ ရန်ကုန်မှာ လက်လုပ်လက်စား၊ နေ့စား၊ စက်ရုံအလုပ်သမား စတဲ့ အခြေခံလူတန်းစား တွေ သိန်းချီရှိတယ်။ သင်္ကြန်ရုံးပိတ်ရက်တွေက နှစ်စဉ် အလုပ်နားနေကျဖြစ်တဲ့အတွက် မသိသာပေ မယ့် သင်္ကြန်အလွန်ကာလတွေမှာ အလုပ်အကိုင်ရရှိရေး၊ ဝင်ငွေရရှိရေးက အရေးကြီးတယ်။ အစိုးရ က ရေရှည်ထောက်ပံံ့ဖို့ မဖြစ်နိုင်ဘူး။ အခုပေးတဲ့ ဆန် ရှစ်ပြည်ဆိုတာ သင်္ကြန်ရုံးပိတ်ရက်အတွင်း စားသောက်ရေးအဆင်ပြေရုံ ပဲ။

စည်းကမ်း

ရန်ကုန် ရပ်မသွားဖို့အတွက် လိုအပ်တာက လူတိုင်းက ကိုယ်ဘာလုပ်ရမလဲဆိုတာ သိဖို့နဲ့ မလုပ်တဲ့သူကို တိတိကျကျ အရေးယူဖို့ ပဲ။ ပြီးခဲ့ တဲ့ ဧပြီ ၁၈ ရက်နေ့ မှာ ထုတ်ခဲ့တဲ့ ကျန်းမာရေးနဲ့ အားကစားဝန်ကြီးဌာနရဲ့ အမိန့်က အဖြေ ထက် မေးခွန်းတွေပိုများစေခဲ့တယ်။ ဒါ့ကြောင့် တိုင်းဒေသကြီးအစိုးရအနေနဲ့ အောက်ပါအချက် များကို ဆောင်ရွက်ပေးနိုင်ရင် ပိုသင့်တော်မယ်လို့ ယူဆပါတယ် –

၁။ ဘယ်လုပ်ငန်းတွေ လုပ်ခွင့်ရှိသလဲ၊ ဘယ်လို စည်းကမ်းချက်တွေနဲ့ လုပ်ငန်းလုပ်ရမလဲဆိုတဲ့ ရှင်းလင်းတိကျတဲ့ စည်းကမ်းသတ်မှတ်ချက်။

၂။ အပြင်ထွက်ခွင့်ရှိတဲ့ သူတွေကို တိတိကျကျ စစ်ဆေးနိုင်မယ့် စနစ်၊ ( ဥပမာ၊ အလုပ်သမား ဆိုရင် သက်ဆိုင်ရာလုပ်ငန်းရှင်ရဲ့ ကဒ်ပြား၊ ဈေးဝယ်ထွက်မယ်ဆိုရင် ရပ်ကွက်ထဲက ထွက်ခွာချိန်၊ ပြန်ဝင်ရမယ့်အချိန်သတ်မှတ်ချက် စသည်ဖြင့် )

၃။ လူမှုရေး၊ ဘာသာရေးအရ လူစုလူဝေးလုပ်ဆောင်တာနဲ့ပတ်သက်တဲ့ တိကျတဲ့ စည်ကမ်း သတ်မှတ်ချက်၊ စောင့်ကြည့်စနစ်။

၄။ စည်းကမ်းချိုးဖောက်မှုများကို စောင့်ကြည့်အရေးယူမယ့် အဖွဲ့အစည်း၊သတင်းပို့စနစ်။ ( ဗဟို ချုပ်ကိုင်မှုမရှိဘဲ တစ်ရပ်ကွက်တစ်မျိုးလုပ်နေတာက အုပ်စုနဲ့ အနိုင်ကျင့်တဲ့ ကိစ္စတွေဖြစ်လာ နိုင်တယ်။)

၅။ အခြေခံလူတန်းစားများအတွက် Work for Food အလုပ်အကိုင်ဖန်တီးပေးမှု။ (အာဖရိက နိုင်ငံတစ်ချို့မှာ မြို့ပြသန့်ရှင်းရေး အတွက် နေ့စားအလုပ်သမားတွေ ခေါ်ပြီးခိုင်းတာမျိုး တွေ့ရ တယ်။ ရောဂါကာကွယ်ရေးစည်းကမ်းတော့ လိုက်နာရပါတယ်။ )

ပြန်လာမယ်

ဗိုင်းရပ်စ်စစ်ပွဲမစခင်ကတော့ ရန်ကုန်သူ၊ ရန်ကုန်သားတွေ အပန်းဖြေခရီးထွက်ရင် နယ်မြို့သူ ၊ နယ်မြို့သားတွေ ပျော်ကြတယ်။ တစ်ခါတစ်လေ စားသောက်ဖွယ်ရာတွေ၊ တည်းခိုရာတွေကို ဈေး တင်ပြီး ဧည့်ဝတ်ကျေကြတယ်။

နယ်မြို့သူ၊ မြို့သားတွေလည်း ရန်ကုန် လာပြီး ဘုရားဖူးတယ်၊ ပျော်တယ်၊ မြို့ပြအလှကိုငေးတယ်၊ ဆေးကုတယ်။ နေပြည်တော်က အစိုးရမင်းများတောင် အကြောင်းအမျိုးမျိုးပြပြီး ရန်ကုန်ကိုလာ ကြတယ်။

အခုတော့ ရန်ကုန်ကလာရင်ပဲ ကြောက်သလိုလို၊ ရန်ကုန်ကို လာရမယ်ဆိုရင် သေတော့မလို ။

ရန်ကုန်ဟာ ပြာပုံထဲက အကြိမ်ကြိမ်ပြန်လည်ရှင်သန်ခဲ့တဲ့ ဖီးနစ်ငှက်ပဲ ။ အခုလည်း ပြန်လည် ရှင်သန်မှာပဲ။

အဲဒီအခါကျတော့ နယ်မြို့သူ၊ မြို့သားတွေကို “ ခင်ဗျားတို့ လာလည်ကြပြီလား” လို့ ပြုံးပြုံးလေး ကြိုရအောင်။