ဒီမိုကရေစီ နဲ့ မီဒီယာ

မတ်လ ၈ ရက်နေ့မှာ ပြန်ကြားရေးဝန်ကြီးဌာနက မဇ္ဈိမ၊ ခေတ်သစ်မီဒီယာ၊ 7 Day ၊ DVB နဲ့ Myanmar Now တို့ကို ထုတ်ဝေခွင့်ပိတ်သိမ်းလိုက်ကြောင်းကြေညာတာကို တွေ့ရတော့ စိတ် မကောင်းဘူး။

သမ္မတ ဦးသိန်းစိန် အစိုးရအဖွဲ့ဝင်တွေထဲမှာ ကျွန်တော်ဟာ မီဒီယာတွေရဲ့ ဝေဖန်တိုက်ခိုက်မှု အများဆုံးခံခဲ့ရတဲ့သူဖြစ်ပါတယ်။ သတင်း/ သတင်းဆောင်းပါး/ ကာတွန်းနဲ့ ဝေဖန်ခံရရုံတင် မဟုတ် ပါဘူး၊ သတင်းသမားတစ်ဦးချင်းရဲ့ ကိုယ်ပိုင်ဖေ့စ်ဘွတ်အကောင့်တွေကနေ ပုဂ္ဂိုလ်ရေး အရ ဝေဖန် တိုက်ခိုက် တာလည်းခံရဖူးပါတယ်။ ကျွန်တော်တက်ရောက်တဲ့အခမ်းအနားကို သပိတ်မှောက်တာ၊ ဆိုင်းဘုတ် ထောင်ဆန္ဒပြတာလဲ ကြုံဖူးတယ်။

ကျွန်တော်ဘက်ကလည်း သတင်းမီဒီယာတွေမှားတယ်၊ ကျင့်ဝတ်နဲ့မညီဘူးလို့ထင်တဲ့အခါ ပြန် ဝေဖန်တာပဲ။ ကိစ္စနှစ်ခုမှာဆိုရင် သတင်းမီဒီယာကောင်စီကတဆင့် ဖြေရှင်းတာမပြေလည်တဲ့ အတွက် ဝန်ကြီး ဌာနအနေနဲ့ တရားစွဲခဲ့တယ်။

တစ်ဖက်မှာလည်း ဒီမိုကရေစီစနစ်မှာ လွတ်လပ်တဲ့မီဒီယာ ရှိရမယ်ဆိုတာကို နားလည်လက်ခံတဲ့အတွက် သတင်းသမားတွေ မေးလာသမ ျှ ဖြေသလို သူတို့ သိချင်တဲ့ သတင်းအချက်အလက်မှန်သမ ျှ အတတ်နိုင်ဆုံး ဖြည့်ဆည်းပေးနိုင်ဖို့ ကြိုးစားခဲ့တယ်။

ကျွန်တော်အမြင်ကတော့ အစိုးရရော၊ မီဒီယာမှာရော အမှားမကင်းနိုင်ပါဘူး။ ဒ့ါကြောင့် ကိုယ်မှား ရင်လည်း ဝေဖန်မှုကို လက်ခံလိုက်၊သတင်းမီဒီယာဘက်က မှားတာ၊ ကျင့်ဝတ်နဲ့ မညီ တာ ရှိရင် ကိစ္စတစ်ခုချင်းအပေါ်မူတည်ပြီး သတင်းမီဒီယာကောင်စီ ကတဆင့်ဖြေရှင်း၊ ဒါမှမကျေနပ် သေးရင် ဥပဒေအရ ရင်ဆိုင်ဖြေရှင်း ဆိုတဲ့နည်းလမ်းပဲ ကျင့်သုံးသင့်တယ်။ သတင်းမီဒီယာ တစ်ခု ရဲ့ လွတ်လပ်စွာထုတ်ဖော်ပြောဆိုခွင့်ကို ပိတ်သိမ်းလိုက်ဖို့အထိ မလုပ်သင့်ဘူးလို့ပဲ ခံယူတယ်။ ကိုယ်တာဝန်ယူစဉ်ကာလမှာ အဲဒီအတိုင်းပဲ ကျင့်သုံးခဲ့ပါတယ်။

အခု သတင်းမီဒီယာငါးခု ထုတ်ဝေခွင့်ပိတ်သိမ်းတဲ့ကိစ္စက အကြောင်းကြောင်း ကြောင့်တင်းမာမှုတွေ မြင့်တက်နေချိန်၊ ကြားဝင်ဖြေရှင်းမယ့် သတင်းမီဒီယာကောင်စီကလည်း မရှိတော့တဲ့အချိန်ဖြစ်တဲ့အတွက် ဒီအခြေ အနေထိ ရောက်သွားခဲ့တာလည်း ဖြစ်နိုင်ပါတယ်။

ဒါ့ကြောင့် သတင်းမီဒီယာတွေပိတ်သိမ်းတဲ့အထိ ဖြစ်ရတဲ့အခြေအနေကို မကြာခင်မှာ ပြေ လည်အောင်ဖြေရှင်းနိုင်ပါစေ လို့ပဲ ဆုတောင်းပါတယ်။ လွတ်လပ်တဲ့ သတင်းမီဒီယာ မရှိ ရင် အင်္ဂါမစုံတဲ့ ဒီမိုကရေစီ ဖြစ်သွားမှာလည်း စိုးရိမ်ပါတယ်။

•