ပုဂံမှာ ဘုရားဖူးဧည့်သည်တွေအလာများတဲ့ ဘုရား ၁၇ ဆူကို ဒီနေ့ ဇူလိုင် ၂၉ ကစပြီး ပိတ်လိုက်တယ်။ ကိုဗစ်ရောဂါ ကာကွယ်ထိန်းချုပ်ရေးလိုအပ်ချက်အရ လိုအပ်လို့ လုပ် ဆောင်တာကို အပြစ်မပြောလိုဘူး၊ လုပ်ပုံလုပ်နည်းကိုတော့ ဝေဖန်ချင်တယ်။
အခု ဆုံးဖြတ်ချက်ဟာ ပြီးခဲ့တဲ့ ဇူလိုင် ၁၉ ရုံးပိတ်ရက်သုံးရက်အတွင်း ပုဂံကို ဧည့်သည်အများအပြားလာရောက်ခဲ့တဲ့အခြေအနေကို မူတည် ပြီး ရုံးပိတ်ရက် လေးရက် ဧည့်သည်လာရောက်မှုကို ထိန်းချုပ်ချင်လို့ လုပ်တာလို့ပဲ နားလည်မိတယ်။
ဒါပေမယ့် ဇူလိုင် ၂၁ ကနေ ဇူလိုင် ၂၉ အထိ ကြားမှာ တစ်ပတ်အချိန်ရတယ်။ ဇူလိုင် ၁၉ ရုံးပိတ် ရက်အခြေအနေအရ ဘုရားတွေကို ပိတ်တော့မယ်ဆိုရင် ဇူလိုင် ၂၄၊ ၂၅ လောက်ထဲက လူသိရှင် ကြားကြေညာသင့်တယ်။ ပုဂံ၊ညောင်ဦးဒေသက ဟိုတယ်၊စားသောက်ဆိုင်၊ ခရီးသွားလုပ်ငန်း နဲ့ ဆက်စပ်အသက်မွေးသူတွေကို ကြိုတင်အသိပေးထားသင့်တယ်။ အခုတော့ ဇူလိုင် ၂၈ ည ၆ နာရီ ကျမှ အစည်းအဝေးလုပ်ပြီး ဂေါပကတွေကို ခေါ်အသိပေးတယ်ဆိုတော့ အတော်နောက်ကျနေပြီ။
အခုတော့
၁။ စားသောက်ဆိုင်တွေ၊ ဟိုတယ်တွေ၊ ဈေးသည်တွေက ရုံးပိတ်ရက်လေးရက်အတွက် ကြိုတင် ပြင်ဆင်ထားပြီးနေပြီ။ ပစ္စည်းတွေဝယ်ပြီးနေပြီ။
၂။ ကိုယ်ပိုင်ကားနဲ့ခရီးမသွားနိုင်သူတွေက ကားလက်မှတ်ကြိုဝယ်၊ ကားကြိုငှားထားပြီးပြီ ။ ဇူလိုင် ၃၀ ညနေဆိုရင် စထွက်တော့မယ်။ ဘုရားတွေပိတ်တယ်ဆိုတော့ သွားရမလား၊နားရမလား ဆုံးဖြတ်ရတော့မယ်။
၃။ ဟိုတယ်၊ တည်းခိုခန်းကြိုငှားထားကြပြီ။ စရန်ပေးထားတဲ့သူတွေ စရန်ဆုံးမယ်။ စရန်မရှိတဲ့ သူတွေက ဘွတ်ကင်ဖျက်လိုက်ရင် ဟိုတယ်၊ တည်းခိုခန်းတွေက ကြိုတင်ပြင်ဆင်ထားတာတွေ အလကားဖြစ်ကုန်ပြီ။
တစ်ချို့ကတော့ ပုဂံမှာ ဘုရားတွေအများကြီး၊ ဒီဘုရားတွေမဖူးရလို့ ဘာမှမဖြစ်ဘူးလို့ ပြော ကောင်းပြောမယ်။ ဒါပေမယ့် ပြည်တွင်း ခရီးသွားတွေလာတာကိုက “ ဘုရားဖူး” ခရီးစဉ်။ တန်ခိုးကြီးဘုရားတွေဖူးရမှလာချင်တာ၊ ဒါ့အပြင် ကိုယ့်ယုံကြည်မှုအရ စွယ်တော်လေးဆူ ဖူးသလို မဖြစ်မနေ လုပ်မယ့် ကိစ္စတွေက ရှိသေးတယ်။ အဲဒါတွေလုပ်ဖို့ အခြေအနေမပေးရင် လာချင်မှာမဟုတ်ဘူး။
အများပြည်သူနဲ့ သက်ဆိုင်တဲ့ မူဝါဒချမှတ်တယ်ဆိုတာ တရုတ်နဂါးကသလိုပဲ။ ခေါင်းက တစ်ချက် လေး လှည့်တာပါဆိုပေမယ့် အမြီးဖျားက တစ်ပတ်ကြီးပြေးရတယ် ဆိုတာလောက်တော့ သိထားသင့်ပါတယ်။
