ကြိုက်သွားမှာပါ

ဒီအက်ဆေးကို ရေးတဲ့အချိန်က ၂၀၁၃ ခုနှစ် ဖေဖော်ဝါရီလ ပြန်ကြားရေး ဝန်ကြီး ဌာန၊ ဒုတိယဝန်ကြီး တာဝန်ထမ်းဆောင်နေချိန်ဖြစ်ပါတယ်။

ဘယ်သူ လာလာ ကြိုက်သွားမှာပ ါဆိုတဲ့ သူတွေနဲ့ ပတ်သက်ပြီး ပတ်ဝန်းကျင်မှာ မြင်တွေ့နေရတဲ့ အဖြစ်အပျက်တွေ၊ ကိုယ်တိုင်ခံစားနေရတဲ့အခြေအနေတွေကို တပ်မတော်သား ဘ၀ က အတွေ့အကြုံနဲ့ ထင်ဟပ်ပြီးရေးခဲ့တာဖြစ်ပါတယ်။

အဲဒီအချိန်က မဖတ်လိုက်ရသူများအတွက် အမှတ်တရ ပြန်တင်ပေးလိုက်ပါတယ်။

xxxxx ဒီတစ်ခေါက် အဲဒီနယ်မြေဘက် ခရီးထွက်ရင်တော့ ဆရာကြီးဆီ ဝင်လည်ပြီး ကျွန်တော့်မရင့်ကျက်မှုအတွက် တောင်းပန် ရဦးမည်။ ပြီးတော့ ကျွန်တော်တို့ပတ်ဝန်းကျင်တွင် ဆရာကြီး ပြောခဲ့သည့် ကြိုက်သွားမှာပါ ဆိုသည့် လူတွေ အများကြီးတွေ့နေရပြီး ကျွန်တော်ကိုယ်တိုင်ပင် အဲဒီလူတွေကို ကြိုက်မသွား မိအောင် မနည်းထိန်းသိမ်းနေရကြောင်း ပြောပြရဦးမည်။ ရင့်ကျက်နေပြီဖြစ်သည့် ဆရာကြီးက ကျွန်တော့်ကို ဗိုလ်ကြီး သူတို့ကိုလည်းမကြိုက်နဲ့ ၊ သူတို့ ကြိုက်တာလည်းမလုပ်နဲ့၊ ဘုရားကြိုက်တာကျင့်၊ ပြည်သူကြိုက်တာလုပ်ဟု ပြန်ပြောလိမ့်မည်ထင်သည်။

( ကောက်နှုတ်ချက်)

===============================================================

ကြိုက်သွားမှာပါ

သူ့ကို ကျွန်တော့် မိခင်တပ်ရင်းမှာ တွေ့ခဲ့ခြင်းဖြစ်သည်။ လူကထောင်ထောင်မောင်းမောင်း၊ ဗလကောင်းကောင်း၊ အသံက လည်း ကျယ်ကျယ်၊ အာဘောင်အာရင်းသန်သန်ဖြင့် ပြောလွန်းသောကြောင့် ရဲဘော်တွေက သူ့နံမည်အရင်းရှေ့မှာ အာဇာနည်လို့ ထပ်တိုးပြီးအခေါ်ခံရသူဖြစ်သည်။ နံမည်ကတော့ထားလိုက်ပါတော့။

ဆရာကြီးကား ရဲဘော်တွေအခေါ် ဆရာကြီးစီကြူဖြစ်၏။ ထိုစကားက အင်္ဂလိပ်ဘာသာဖြင့် Company Quartermaster ကို အတိုကောက်ခေါ်ခြင်းဖြစ်သည်။တပ်မတော်ရာထူး အခေါ်အဝေါ်အမှန်အရဆိုလျှင် တပ်ခွဲတပ်ကြပ်ကြီးဖြစ်သည်။ ဒါပေမယ့် တပ်မတော်ထဲမှာတော့ ဘယ်သူမှ ဒီလိုမခေါ် ဆရာကြီးစီကြူဟုသာအမည်တွင်သည်။

တပ်ခွဲတပ်ကြပ်ကြီး တနည်း ဆရာကြီးစီကြူကား အရာရှိမဟုတ်သော်လည်း တပ်ခွဲတစ်ခွဲတွင်မူ အတော်ကြီးသော အကောင် ဖြစ်သည်။ တပ်ခွဲ၏ ရိက္ခာကိစ္စအ၀၀ကို စီမံခန့်ခွဲရသည်။ ထိုအချိန်က ငှားရမ်းသုံးစွဲခွင့်ရှိသည့် အထမ်းသမား၊ လှည်း စသည်တို့ကို ငှားရမ်းခြင်း၊ ခွဲဝေအသုံးပြုခြင်းကိစ္စအ၀၀ကို ကိုင်တွယ်ရသည်။ တပ်ခွဲမှူးနဲ့ တပ်ခွဲရုံး၏ စားရေး သောက်ရေး ကို စီစဉ်ရသည်။ တနည်းအားဖြင့် တပ်ခွဲ၏ အုပ်ချုပ်မှုကိစ္စအ၀၀တွင် တပ်ခွဲမှူး၏ လက်ရုံးဖြစ်သည်။

ကျွန်တော်တို့ စီကြူကြီးကားအဆိုပါအခွင့်အရေးများကို အပြည့်အဝအသုံးချသူဖြစ်သည်။ ရိက္ခာဝေသည်ဆိုပါစို့၊ ထုံးစံ အတိုင်း တပ်ခွဲရုံးက တပ်ခွဲတစ်ခွဲလုံးအတွက် စစ်ကြောင်းရုံး၊ ဒါမှမဟုတ် ရိက္ခာဝေစခန်းကနေ ထုတ်သည်။ ပြီးတော့မှ တပ်စုများကို သူ့အင်အားအလိုက်ရသင့်သည့်ရိက္ခာကို ခွဲဝေပေးရသည်။ တပ်မတော်ရိက္ခာနှုန်းထားအရ စစ်သည်တစ်ဦး အတွက် တစ်နေ့လျှင် ဆန် ၂၆ အောင်စ၊ ကုလားပဲ ၅ ကျပ်သား၊ ဆီ ၁.၂၅ကျပ်သား၊ ဆား ဝ.၇၅ ကျပ်သား စသည်ဖြင့် ငပိ၊ ငြုပ်၊ နနွင်း၊ လက်ဖက်ခြောက်၊ သကြား၊ နို့ဆီ အမယ်ဆယ်မျိုးအတွက် သတ်မှတ်ထားသောနှုန်းထားရှိသည်။ ရိက္ခာ စိုလို့ခေါ်သည့် အသားငါးဝယ်စားဖို့အတွက် (၁၉၈၁ခုနှစ်) စစ်သည်တစ်ဦးလျှင် တစ်နေ့လျှင် တစ်ကျပ်နှစ်ဆယ့်ငါးပြား ရသည်။

ထိုနှုန်းထားအတိုင်း တပ်စုရှိအင်အားအတွက် ဘယ်လောက်ရိက္ခာ ဘယ်လောက်ရသင့်သလဲ တွက်ဖို့အတွက် အစဉ် အလာအရ သတ်မှတ် ထားသည့် တွက်နည်းတွေရှိသည်။မှတ်မိသလောက်ဆိုလျှင် အင်အားကိုတည် ၁.၆၂၅ နှင့်မြှောက် လျှင်ဆန်၊ ဆန်ကို .၀၅ နှင့်မြှောက်လျှင် ပဲ၊ ပဲကို ဝ.၀၁၂၅ နှင့်မြှောက်လျှင် ဆီ စသည်ဖြင့် အဆင့်ဆင့်တွက်ရသော လက်ရိုး တွက်နည်းတွေနဲ့ တွက်ပြီး ခွဲဝေရသည်။ ရိက္ခာခွဲဝေတော့လည်း ရှေ့တန်းမှာဖြစ်သောကြောင့် ကတ္တား တွေ ဘာတွေရှိတာမဟုတ်။ တပ်မတော်၏ ရှေ့တန်းချင်တွယ်မှုစံသည် စစ်သည်တိုင်းကို ထုတ်ပေးထားသော ဟန်းကော ဖြစ် သည်။ ဟန်းကော ဆိုသည့်ဝေါဟာရ ဘယ်ကလာသည်ကို တစ်ခါမှ မစဉ်းစားမိ။ တစ်ချို့ကတော့ ဂျပန်စကားလို့ လည်း ပြောသည်။ ဟန်းကောဆိုသည်မှာ သံကိုင်းပါ သည့် လေးထောင့်ပုံချိုင့်ဖြစ်သည်။ စစ်သားဘဝတွင် ဟန်းကောသည် လိုရာ သုံးဖြစ်၏။ ရေချိုးလျှင် ဟန်းကော၊ ရေနွေးတည်ရင်လည်း ဟန်းကော၊ ထမင်းချက်တော့လည်း ဟန်းကော၊ ဟင်းချက် လည်းဟန်းကောဖြစ်သည်။

ထိုဟန်းကောသည်ပင် ကျွန်တော်တို့အတွက် ရိက္ခာချင်တွယ်သောကရိယာလည်း ဖြစ်သည်။ ဟန်းကောတစ်လုံးသည်ဆန် လေးပေါင်ဖြစ်၏။ ဟန်းကောလည်ပင်းအရစ်အထိသည် ဆားတစ်ပိဿာ၊ ဆီ တစ်ပိဿာ၊ သကြားတစ်ပိဿာဖြစ်၏။ ထို့ထက်နည်းလျှင် နို့ဆီဘူးနှင့်ချိန်ရသည်။ နို့ဆီဘူးမရှိလည်း ကိစ္စမရှိ၊ ဟန်းကော အလယ်အံ သည် နို့ဆီဘူးတစ်ဘူးနှင့်ညီ၍ ဟန်းကောအဖုံးသည် နို့ဆီဘူးတစ်လုံးခွဲနှင့် ညီ၏။ ဤကား ရှေ့ အဆက်ဆက်သော စစ်သားကြီးများ၏ အလိုတည်း။

ဒီလိုရိက္ခာခွဲပြီဆိုလျှင် ဆရာကြီးစီကြူအခန်းကဏ္ဍရောက်ပေပြီ။ ဆရာကြီးက ရိက္ခာမထုတ်ခင်တစ်ရက်ကြိုပြီး တွက်ချက် ထားသဖြင့် ဘယ်တပ်စုဘယ်လောက်ရမလဲဆိုတာ အသင့်ရှိနေပြီဖြစ်သည်။ ရိက္ခာတွေရောက်သည်နှင့် ဟန်းကောနှင့် တစ်ခါတည်းချင်တွယ်ပြီးခွဲဝေတော့သည်။ ဒီမှာ ဆရာကြီးစီကြူ၏ ဟန်းကောက စကားပြောလေပြီ။ တပ်မတော်က ထုတ် ပေးသည့် ဟန်းကောကားအလှသွေးကြွယ်သည့် မိန်းမပျိုလေးသဖွယ် ပြည့်ပြည့်ဖောင်းဖောင်း၊ ဆရာကြီး၏ ဟန်းကော ကား ဇရာထောင်းသည့်အဖွားအိုသဖွယ် ပိန်လိန်ရှုံ့တွနေ၏။ ဒီဟန်းကောကို ဘယ်တုန်းကစပြီး ဆရာကြီးစီကြူထိန်းသိမ်း ထားခဲ့သည်ဟု မသိနိုင်။ ရဲဘော်တစ်ချို့ကတော့ ဆရာကြီးစီကြူရဲဘော်သစ်ဘဝထဲက ဟန်းကော လို့ ဆိုသည်။ တစ်ချို့ ကတော့ ဆရာကြီးက စိတ်တိုတိုင်း ဟန်းကောကို တက်နင်း၊ ပိတ်ကန်သဖြင့် ဒီလိုပုံဖြစ်သွားရသည်ဟုလည်း ပြောသည်။ ဘာပဲဖြစ်ဖြစ် ဒီဟန်းကောနှင့် ရိက္ခာချိန်တွယ်ပေးသဖြင့် တပ်စုတွေမှာ ဘယ်တော့မှ ရိက္ခာအပြည့်မရ။

ခရီးထွက်တော့လည်းဆရာကြီးစီကြူကကျွန်တော်တို့တပ်စုမှူးတွေထက်ပိုဇိမ်ကျသည်။ ကျွန်တော်တို့တစ်တွေ ကျောပိုး အိတ်တစ်ကားကားနဲ့ ပြေးလွှားနေချိန်တွင် ဆရာကြီးကတော့ သူ့ကျောပိုးအိတ်ကို ရိက္ခာတွေနဲ့အတူ အထမ်းသမားများ နဲ့ သယ်လာပြီး တုတ်ကောက်လေးတစ်ချောင်းနဲ့ တပ်ခွဲမှူးစတိုင်ဖမ်းပြီးကြော့နေသည်။ တစ်ခါတစ်လေ လှည်းတွေငှားပြီး သွားရသည့် အခါမျိုးကျတော့လည်း စားပြီး သောက်ပြီး လှည်းခြောက်စီး တစ်စီးပေါင်းမိုးပါရမယ် ဆိုသည့် စာချိုးအတိုင်း ပေါင်းမိုးတပ် ရိက္ခာလှည်းပေါ်တွင် ဆရာကြီးက အခန့်သား။

ရွာတွေမှာ စခန်းချတော့ကော၊ လုံခြုံရေးအရ တပ်စုတွေက ရွာစွန်၊ ရွာပြင်မှာ၊ တပ်ခွဲရုံးက ရွာထဲမှာ။ ဒီလို စခန်းချပြီ ဆိုလျှင် ဆရာကြီးစီကြူက အိမ်ကြီး၊ ရေပေါ၊ အပျိုချောရမယ်ဆိုတဲ့ စာဆိုနဲ့အညီ အိမ်ကြီးအိမ်ကောင်းမှာနေသည်။ သူ့ဆင်ခြေကတော့ ရိက္ခာတွေ၊ အထမ်းသမားတွေနဲ့ သိမ်းရ၊ ချက်ရ၊ပြုတ်ရဆိုတော့ အိမ်ကြီးဖို့လိုသည်ဆိုပဲ။ တစ်ခါ တစ်လေ တပ်ခွဲမှူးနေသောအိမ်တောင်သူ့အိမ်လောက်မကောင်း။

ကျွန်တော်က ကျောင်းဆင်းစဒုဗိုလ်၊ လူငယ်မာန်နဲ့ ဆရာကြီးစီကြူလုပ်ပုံကို ကြည့်မရ။ ဒါပေမယ့် ကိုယ်ထက် စီနီယာ ကျ သည့် တပ်စုမှူးနောက်တစ်ယောက်ကတောင် ဘာမှ မပြောတော့ ကိုယ်လည်း ဘာမှမလုပ်နိုင်။ ဒီလိုနဲ့ စစ်ဆင်ရေး နှစ်ကြိမ်ထွက်ပြီးတစ်နှစ်ကျော်ကြာတော့ ကျွန်တော်လည်း ဗိုလ်အဆင့်ဖြစ်လာပြီ။ တပ်ရင်းမှာလည်း တစ်နှစ်ကျော်လာပြီ ဆိုတော့ ရဲဘော်တွေအဆို ပဲချိုးတက်လာပြီး ပြောရဆိုရဲ၊ လုပ်ရဲကိုင်ရဲဖြစ်လာသည်။

ဒီလိုနဲ့ နောက်စစ်ဆင်ရေးမှာတော့ အုပ်ချုပ်မှုကိစ္စတစ်ခုနဲ့ပတ်သက်ပြီး သူနဲ့ ကျွန်တော်ထိပ်တိုက်တွေ့ရသည်။ တပ်ခွဲမှူး ကွယ်ရာမှာ ဆွေးနွေးရင်း ကျွန်တော်က စိတ်တိုတိုနဲ့ ဆရာကြီးစီကြူ ××× ခင်ဗျား တပ်ခွဲမှူးကိုပဲ ဖားပြီး ကျွန်တော် တို့ဆီက ဟို ဖြတ်၊ဒီဖြတ်လုပ်မနေနဲ့။ တပ်ခွဲမှူးက နောက်နှစ်ဆိုတပ်ပြောင်းရတော့မှာ ( ထိုအချိန်က အရာရှိတစ်ဦးကို တပ်ရင်းတစ်ရင်းတွင်ငါးနှစ်ခန့်သာထားသည်။) ကျူပ်ကတစ်နှစ်ပဲရှိသေးတယ်။ ကျွန်တော်တပ်ခွဲမှူးဖြစ်ရင် ခင်ဗျား နာမယ် ဟု ပြောလိုက်မိသည်။

ကျွန်တော်စကားသံအဆုံးတွင် ဆရာကြီးက အံ့အားသင့်ပြီး ကျွန်တော့ကို လှမ်းကြည့်သည်။ ပြီးတော့မှ ဗိုလ်ကြီး တပ်ခွဲမှူး ဖြစ်ရင်လည်း ကျွန်တော့်ကို ကြိုက်သွားမှာပါ ဟု ခပ်အေးအေးလေးဆိုသည်။ သူ့စကားအဆုံးတွင် ကျွန်တော် ပြန်ပြော စရာစကားမရှိတော့။ ဒါနဲ့ပဲ လှည့်ထွက်ခဲ့ရသည်။ နှောင်းတမြေ့မြေ့ ရုပ်ရှင်ထဲက (ကို) သုမောင်လို လှည့် အထွက်မှာ ခဲလုံး ကို ပိတ်ကန်ပစ်ချင်စိတ်ပေါ်ခဲ့သည်။

သို့သော် ထိုတပ်ခွဲတွင် ကျွန်တော်တပ်ခွဲမှူးမဖြစ်ခဲ့ပါ။ တစ်ခြားတပ်ခွဲများမှာသာ တပ်ခွဲမှူးတာဝန်ထမ်းဆောင်ခဲ့ရသည်။ ဆရာကြီး စီကြူကတော့ သူ့စကားအတိုင်း ဘယ်တပ်ခွဲမှူးရောက်ရောက် အဆင်ပြေနေတာပဲဖြစ်သည်။ တပ်ခွဲမှူးက ပုတီး သမားဆို ရင် ဆရာကြီးက ဥပသကာ၊ တပ်ခွဲမှူးက ညနေစောင်းလို့ ရီဝေေ၀ဆိုရင် ဆရာကြီးက အမြည်းအသင့်။

ဒီလိုနဲ့ ကျွန်တော်လည်း တပ်ရင်း၊တပ်ဖွဲ့အမျိုးမျိုးကိုပြောင်းရွှေ့ခဲ့ပြီးနောက်ဆုံးတော့ နယ်ဘက်တာဝန်များကိုပြောင်းလဲ ထမ်းဆောင်ခဲ့ရသည်။ ၂၀၀၈ ခုနှစ်မှာတော့ ကျွန်တော့်မိခင်တပ်ရင်းရှိရာနယ်မြေသို့ ခရီးထွက်ခဲ့ရသည်။ ကျွန်တော့် တပ်ရင်းရှိရာ မြို့က ကျွန်တော်တို့ဌာနရုံးလေးမှာ ရဲဘော်ရဲဘက်ဟောင်းများနဲ့ ပြန်ဆုံစည်းကြသည်။ ထိုအထဲတွင် ဆရာ ကြီးစီကြူလည်းပါသည်။ ဆရာကြီးက တပ်မှ အငြိမ်းစားယူပြီး မြို့အထွက်က ရွာလေးမှာ အခြေချနေသည်။ ဟိုတုံးက အကြောင်းတွေ ပြောကြရင်း ကျွန်တော်က ဆရာကြီးစီကြူကို ကြိုက်သွားမှာပါ ဆိုသည့် စကားအကြောင်းအစဖော်ရင်း ဆရာကြီး အခုရော ဘယ်သူ့အကြိုက်တွေလုပ်နေတုန်းဟု မေးမိသည်။ ဆရာကြီးက ဗိုလ်ကြီးက ခုထိ သတိရနေတာ ကိုး၊ ဟိုတုန်းတော့ အဲဒီလိုပေါ့။ အခုတော့ ဘုရားအကြိုက်ပဲနေပါတယ်ဟု ပြန်ဖြေသည်။ တကယ်လည်း အေးအေးချမ်းချမ်း တရားရိပ်မှာ နေထိုင်နေပုံရသည်။

၂၀၀၈ ခုနှစ်နောက်ပိုင်း တံတားအောက်မှာ ရေတွေအများကြီး ဖြတ်သန်းစီးဆင်းသွားခဲ့ပြီ။ ကျွန်တော်ပင်လျှင် ရာထူး အဆင့်ဆင့်တိုးခဲ့ပြီ။ ဆရာကြီးနဲ့လည်း မတွေ့ဖြစ်တော့။ နောက်ဆုံးအကြိမ်တွေ့တုံးကတော့ စိတ်ထဲမှာ ရှိနေသည့် အခု အခံလေးကြောင့် ဆရာကြီးကို ခနဲ့တဲ့တဲ့ မေးခဲ့ခြင်းဖြစ်၏။ အခုပြန်စဉ်းစားလိုက်တော့ ရင့်ကျက်မှုနည်းပါးသည့် ကိုယ့်စိတ် ကို ပြန်ရှက်မိသည်။

ဒီတစ်ခေါက် အဲဒီနယ်မြေဘက် ခရီးထွက်ရင်တော့ ဆရာကြီးဆီ ဝင်လည်ပြီး ကျွန်တော့်မရင့်ကျက်မှုအတွက် တောင်းပန် ရဦးမည်။ ပြီးတော့ ကျွန်တော်တို့ပတ်ဝန်းကျင်တွင် ဆရာကြီး ပြောခဲ့သည့် ကြိုက်သွားမှာပါ ဆိုသည့် လူတွေ အများကြီးတွေ့နေရပြီး ကျွန်တော်ကိုယ်တိုင်ပင် အဲဒီလူတွေကို ကြိုက်မ သွားမိအောင် မနည်းထိန်းသိမ်းနေရကြောင်း ပြောပြရဦးမည်။

ရင့်ကျက်နေပြီဖြစ်သည့် ဆရာကြီးက ကျွန်တော့်ကို ဗိုလ်ကြီး သူတို့ကိုလည်းမကြိုက်နဲ့ ၊ သူတို့ ကြိုက်တာလည်းမလုပ်နဲ့၊ ဘုရားကြိုက်တာကျင့်၊ ပြည်သူကြိုက်တာလုပ်ဟု ပြန်ပြောလိမ့်မည်ထင်သည်။

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: