သူငယ်ချင်းနှစ်ယောက်ဆွေးနွေးခန်း (၂၁)

ကျွန်တော်- ဒီတစ်ခါတော့ ပြုံးပြုံးကြီးပါလား။ ဘာတွေဖြစ်လာတာတုံး။

သူငယ်ချင်း- မင်းမသိသေးဘူးလား။ BRICS အဖွဲ့ကြီးက ကိုယ်ပိုင်ငွေထုတ်တော့မယ်တဲ့။ အဲဒါနဲ့ အိတ်စပို့ ၊ အင်ပို့ ငွေချေလို့ရတော့မယ်။ ငါတို့  ကုမ္ပဏီ ဒေါ်လာကြောင့် စိတ်မညစ်ရတော့ဘူး၊ ဒေါ်လာကို မသုံးတော့ဘူး၊  ဟို ငပွကြီး အမေရိကန်ကိုလည်း ဂရုစိုက်ဖို့ မလိုတော့ဘူး လို့ ဘော့စ် ကပြောလိုက်တယ်။  

ကျွန်တော်-  မင်းကလည်း အီးယူက ယူရို ငွေကို သူတို့ ဘုံငွေကြေးအဖြစ်ထုတ်ပြီး သုံးလာတာ အနှစ်နှစ်ဆယ် ရှိပြီ၊ ကမ္ဘာ့ငွေကြေးဈေးကွက်မှာ ဒေါ်လာနေရာကို အစားထိုးနိုင်လို့လား။  နိုင်ငံတကာ ကုန်သွယ်မှု ရှစ်ဆယ် ရာခိုင်နှုန်းလောက်က ဒေါ်လာနဲ့ပဲ လုပ်နေတာ။  မင်းပြောတဲ့ BRICS က ဆောက်ဖြစ်မှ ကျောင်းဒကာ၊ လုပ်ဖြစ်ရင်တောင် ဒေါ်လာ ကို အစားထိုးနိုင်ဖို့ အဝေးကြီး။

သူငယ်ချင်း-မင်းကလည်း BRICS မှာ တရုတ်၊ ရုရှား၊ အိန္ဒိယတို့လို ဆရာကြီးတွေပါတယ်လေကွာ၊ နောက်ပြီး ဆော်ဒီတို့ ယူအေအီးတို့ ရေနံသူဌေးတွေလည်း ပါဦးမှာတဲ့    ။ 

ကျွန်တော်-  ဘုံငွေကြေးအသစ်တစ်ခုထုတ်တယ်ဆိုတာ ကိုယ့်နိုင်ငံထဲမှာ ကိုယ် ငွေစက္ကူရိုက်သလောက် လွယ်တာမဟုတ်ဘူးကိုယ့်လူ။ ကိုယ့်နိုင်ငံမှာတောင် မလုပ်တတ်ရင်တိုင်ပတ်နေတာ ဇင်ဘာဘွေကိုပဲ ကြည့်။  ပထမဆုံး အဲဒီ ငွေကြေးကို အာမခံဖို့အတွက် ဗဟိုဘဏ် တစ်ခု ထူထောင် ရမှာ ။ အီးယူ မှာ ဥရောပဗဟိုဘဏ်က ယူရိုကို အာမခံပေးသလိုပေါ့။ အီးယူ နိုင်ငံတွေဆိုတာက တစ်နိုင်ငံနဲ့ တစ်နိုင်ငံ စီးပွားရေး၊ ငွေကြေးစီမံခန့်ခွဲမှု တွေက ထပ်တူနီးပါးတူအောင်လုပ်ထားတာ တဲ့အတွက် အဲဒီလို ဗဟိုဘဏ်တစ်ခု ထူထောင်ရတာ လွယ်တယ်။ မင်းရဲ့ BRICS နိုင်ငံတွေက တစ် ကျောင်းတစ်ဂါထာတွေ၊  မင်း ပြောတဲ့ ဆရာကြီးသုံးနိုင်ငံတောင် စနစ်က တစ်မျိုးစီ၊ ညှိဖို့အတော်လုပ်ရဦးမှာ။ 

သူငယ်ချင်း- ဘော့စ်ပြောတဲ့အထဲမှာ အဲဒါတွေမပါပါလား၊ နောက်နှစ်လောက်ဆိုရင်ပဲ သုံးလို့ရတော့မလိုလို။

ကျွန်တော်- ကုမ္ပဏီအခြေအနေမကောင်းတော့ မင်းတို့ စိတ်ပျက်မသွားအောင် အနံ့ပေးထားတာ ဖြစ်မှာပေါ့။ 

ဤတွင်တစ်ခန်းရပ်  

မှတ်ချက်။ 

၁။ BRICS – ဘရာဇီး၊ ရုရှား၊ အိန္ဒိယ၊ တရုတ်နှင့်တောင်အာဖရိကနိုင်ငံများပါဝင်သည့် ထွန်းသစ်စ စီးပွားရေးအင်အားကြီးနိုင်ငံများအဖွဲ့။

၂။ အီးယူ , ဥရောပသမဂ္ဂ –  ဥရောပတိုက်မှ  အဖွဲ့ဝင် ၂၇ နိုင်ငံပါဝင်သည့် နိုင်ငံရေးနှင့် စီးပွားရေးဆိုင်ရာ ပူးပေါင်း ဆောင်ရွက်မှုအဖွဲ့