ဆု အတု နဲ့ ဒေါက်တာဝင်းမြတ်အေး

ဆု အတု နဲ့ ဒေါက်တာဝင်းမြတ်အေး

ပြည်ထောင်စုရာထူးဝန်အဖွဲ့ဥက္ကဋ္ဌ ဦးဝင်းသိမ်းရဲ့ ဒေါက်တာ ဘွဲ့အတု ကိစ္စ၊ ဟိုတယ်နှင့် ခရီးသွားလာရေးဝန်ကြီးဌာန ရဲ့ စီစဉ်မှုနဲ့ ဒုတိယသမ္မတ ဦးဟင်နရီဗန်ထီးယူက ခရီးသွားဆုအတု လက်ခံယူရတော့မယ့် ကိစ္စ တွေကို ဖော်ထုတ်ရေးသားခဲ့တဲ့ (ကို) နေယံဦး #NayYanOo က သူ့ဖေ့ဘွစ် စာမျက် နှာမှာ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ၊ ပြည်ထောင်စု ဝန်ကြီး ဒေါက်တာဝင်းမြတ်အေး လက်ခံရယူထားတဲ့ ဆုအတုတစ်ခု အကြောင်း ကို ဓာတ်ပုံအထောက်အထားတွေနဲ့ တကွ ဖော်ထုတ်ရေး သားထားပါတယ်။

နေယံဦးက အင်န်အယ်လ်ဒီအစိုးရအဖွဲ့မှာ တက္ကသိုလ် ပါမောက္ခချုပ်တွေကို ပြည်ထောင်စု ဝန်ကြီး ခန့်အပ်တာဝန်ပေးမှုတွေအပေါ် ဆက်စပ်လေ့လာရင်းတွေ့ ရှိလာတဲ့အတွက် ဖော်ထုတ် ရေးသား တာဖြစ်တယ်လို့ဆိုပါတယ်။ သူရေးသားထားတဲ့အထဲက အရေးကြီးတဲ့အချက်တွေကတော့ အောက်ပါအတိုင်းဖြစ်ပါတယ်။

၁။ ဒေါက်တာဝင်းမြတ်အေးရဲ့ မြန်မာ/ အင်္ဂလိပ်ဘာသာနဲ့တင်ထားတဲ့ ကိုယ်ရေးအချက်အလ က် တွေမှာ အင်္ဂလန်နိုင်ငံ Oxford တွင် ကျင်းပသော Oxford Summit of Leader မှာ “ဆေးတက္ကသိုလ် (မကွေး) တွင် အချိန်တိုအတွင်း ပြုပြင်ပြောင်းလဲမှု များ ပြုလုပ်နိုင်ခဲ့ခြင်းကြောင့် ဆေးတက္ကသိုလ် (မကွေး)ကို The Best University in the Region ဆုနှင့် မိမိ အား The Best Manager Award ချီးမြှင့်ခြင်း ခံရသည်” လို့ ဖော်ပြထားတယ်။

၂။ အဲဒီဆုကို ၂၀၁၃ ခုနှစ် ဒီဇင်ဘာမှာ ဒေါက်တာဝင်းမြတ်အေး ကိုယ်တိုင် သွားရောက်လက်ခံ ယူခဲ့တယ်။

၃။ ဒီဆုရတာနဲ့ပတ်သက်ပြီး ၂၀၁၄ ခုနှစ်၊ ဧပြီလမှာ ဒုသမ္မတ ဒေါက်တာစိုင်းမောက်ခမ်း က ပါမောက္ခချုပ်လုပ်နေတဲ့ ဒေါက်တာဝင်းမြတ်အေးကို “မြို့ပြနှင့်အလှမ်းကွာဝေးသော်လည်း နိုင်ငံတကာတက္ကသိုလ်များ နှင့်ချိတ်ဆက်၍ ဆောင်ရွက်နိုင်သည့်အပြင် Oxford Summit of Leader 2013 ဆုရရှိသည့်အတွက် ပါမောက္ခချုပ်၊ ဆရာ ဆရာမများနှင့် ဌာနဆိုင်ရာ တာဝန်ရှိသူများ၏ ကြိုးစား အားထုတ်မှုကို အသိအမှတ်ပြု ပါသည်” လို့ ချီးကျူးစကားပြောခဲ့ တယ်။

၄။ ဒါပေမယ့် အဲဒီဆုကို ချီးမြှင့်တာက ကမ္ဘာကျော် အောက်စ်ဖို့ဒ်တက္ကသိုလ်မဟုတ် ဘူး။ Europe Business Assembly (EBA) လို့ခေါ်တဲ့ အောက်စ်ဖိုဒ့်အခြေစိုက် အဖွဲ့တစ်ခုက ပေးတာ။ အဲ့ဒီအဖွဲ့က ဂုဏ်သိက္ခာရှိတဲ့ အဖွဲ့အစည်း မဟုတ်တဲ့အပြင်၊ နာမည်ပေါင်းစုံနဲ့ ဆုတံဆိပ်ပေါင်းစုံကို ပိုက်ဆံယူပြီး ပေးတဲ့ အဖွဲ့ဖြစ်နေတယ်။

၅။ ဒေါက်တာဝင်းမြတ်အေးအနေနဲ့ သူရတဲ့ဆုကို အောက်စ်ဖိုဒ့်တက္ကသိုလ် University of Oxford ကပေးတာလား၊ Europe Business Assembly (EBA) ကပေးတာလားဆိုတာ ကိုယ် ရေးအချက်အလက်တွေမှာ ရှင်းရှင်းလင်းလင်းရေးမထားတဲ့အတွက် အောက်စ်ဖိုဒ့် တက္ကသိုလ်က ရတယ်လို့ ထင်စရာဖြစ်နေတယ်။ နေယံဦး ကိုယ်တိုင် အစပိုင်းမှာ အဲဒီလို ထင်ခဲ့ တယ်။

ဒီနေရာမှာ နေယံဦးဆောင်းပါးမှာ ထောက်ပြဖို့ကျန်တဲ့အချက်တစ်ချက်ရှိတယ်။ ဒါက ဒေါက်တာ ဝင်းမြတ်အေး ကိုယ်တိုင် ဆုသွားရောက်လက်ခံတဲ့ကိစ္စဖြစ်ပါတယ်။ ဆုကိုလက်ခံတဲ့ ၂၀၁၃ ခုနှစ် မှာ ဒေါက်တာဝင်းမြတ်အေးဟာ အစိုးရဝန်ထမ်းဖြစ်ပါတယ်။ ဒီတော့ အစိုးရ ဝန်ထမ်းတွေ ပြည်ပ ခရီးသွားတဲ့အခါ နည်းလမ်းနှစ်ခုရှိတယ်။

၁။ တစ်ခုက တစ်ဖက်အဖွဲ့အစည်းက ဖိတ်ကြားလို့ သွားတာ။ အဲဒီလို ဖိတ်ကြားလို့ သွား မယ် ဆိုရင် ဝန်ကြီးဌာနကို တင်ရတယ်။ ကုန်ကျစရိတ်ကို နိုင်ငံတော်က ကျခံရမှာလား၊ ဖိတ်ကြား သူဘက်က ကျခံမှာလားဖော်ပြရတယ်။ ဝန်ကြီးက သဘောတူရင် အစိုးရအဖွဲ့ကို တင်ပြရတယ်။ ခွင်ြ့ပုချက်ရမှ သွားရတယ်။ အဲဒီလိုသွားရင် အစိုးရအရာရှိများအတွက် သီးသန့်ထုတ်ပေးထားတဲ့ နိုင်ငံကူးလက်မှတ်နဲ့ သွားရတယ်။ သတ်မှတ်ထားတဲ့ နေ့တွက်စရိတ်၊ ဝတ်စုံစရိတ် စတာတွေကို ခံစား ခွင့်ရှိတယ်။

၂။ နောက်တစ်မျိုးက ကိုယ့်အစီအစဉ်နဲ့ ကိုယ်သွားတာ။ ဥပမာ ဆေးကုဖို့၊ ဘုရားဖူးဖို့။ အဲဒါ ဆိုရင် ဝန်ကြီးဌာနကို ပြည်ပခရီးသွားခွင့်တင်ပြရတယ်။ ရာထူးအဆင့်အ တန်း နဲ့ တာဝန်အပေါ် မူတည်ပြီး ဝန်ကြီးက ခွင့်ပြုတာရှိသလို အစိုးရအဖွဲ့ရုံးကို တင်ပြ တာ လည်းရှိတယ်။ ခွင့်ပြုချက်ရရင် ကိုယ့် အစီအစဉ်နဲ့ ကိုယ်သွားရတယ်။ နိုင်ငံ ကူူးလက်မှတ်က သာမန်နိုင်ငံကူးလက်မှတ်နဲ့ သွားရတယ်။ တစ်ချိန်ကဆိုရင် ပြည်ပခရီးသွားခွင့် ရပြီးမှ သာမန် နိုင်ငံကူးလက်မှတ်လုပ်ပေးတာတောင်ရှိခဲ့တယ်။

ဒါ့ကြောင့် ဒေါက်တာဝင်းမြတ်အေး EBA ကပေးတဲ့ ဆုကို သွားယူတဲ့အချိန်က ဘယ်လို သွားခဲ့ သလဲဆိုတာလည်းစိတ်ဝင်စားဖို့ကောင်းပါတယ်။

ကျွန်တော်က ဒေါက်တာဝင်းမြတ်အေးကို စင်္ကာပူမှာ လုပ်တဲ့ နာဂစ် ဆယ်နှစ်မြောက် စကားဝိုင်း မှာဆုံဖူးပါတယ်။ သူ့လုပ်ဆောင်ချက်တွေကို လူမှုကွန်ယက်ကနေ လေ့လာဖူးတယ်။ သူတော် တယ်၊ အလုပ်လုပ်တယ်ဆိုတယ်ဆိုတာ လူထုကရော၊ မီဒီယာကရော၊ တွဲလုပ်ဖူးတဲ့ ပြည် တွင်း၊ပြည်ပအဖွဲ့အစည်းတွေကရော အသိအမှတ်ပြုတယ်။

ဒေါက်တာ ဝင်းမြတ်အေးဟာ အင်န် အယ်လ်ဒီ အစိုးရစတင်ဖွဲ့စည်းချိန်က ဒေါက်တာအတုပြဿနာ တက်ခဲ့ တဲ့ပုဂ္ဂိုလ်တွေထက်ရော၊ နေယံဦးထောက်ပြခဲ့တဲ့ ဒေါက်တာ အတု၊ ဆုအတု ပြဿနာတက်သူ တွေထက်သမိုင်းကြောင်းအရရော၊ လက်ရှိတာဝန် ထမ်းဆောင်မှုအရရော အဖက်ဖက်က သာတယ်ဆိုတာ ဘယ်သူမှ မငြင်းနိုင်ဘူး။

ဒါ့ကြောင့် EBA ကပေးတဲ့ဆု ကို သူယူမိတာနဲ့ပတ်သက်ပြီး အမြန်ဆုံးရှင်းလင်းစေချ င်တယ်။ အရင် ပုဂ္ဂိုလ်တွေလို မသိကျိုးကျွန်ပြုပြီး ဒေါက်တာဘွဲ့မသုံးတော့တာမျိုး၊ဆုမယူတော့တာ မျိုးနဲ့ မဖြေရှင်းသင့်ဘူး။ ဆုယူမိတဲ့အကြောင်းကို သင်ခန်းစာဖော်ထုတ်သင့်တယ်။ မှားရင်လည်း အမှားကို ဝန်ခံသင့်တယ်။

သူ့သမိုင်းကို သူလုပ်ဆောင်ချက်တွေ နဲ့ ပြခဲ့ပြီးဖြစ်တဲ့အတွက် ဒီဆုရထားတာက အရေး မပါပါဘူး။ တန်ဖိုးမရှိတဲ့ ဆုဖြစ်ကြောင်း ပေါ်ပေါက်လာတာကို မသိချင် ယောင် ဆောင်နေရင်သာ ဂုဏ်သိက္ခာထိခိုက်ဖို့ရှိတယ်။