မန္တလာ အိုးေ၀

“ အိုးေ၀ လို့ပဲ ခေါ်ပါဗျာ၊ တုပ်တုပ် လို့မခေါ်ပါနဲ့”

မန္တလေးက အိုးေ၀ စီးတော်ယာဉ်မောင်းရဲ့ တောင်းဆိုချက်ပေါ့။ ကျွန်တော် မန္တလေးမှာ တစ် ပတ် နေခဲ့ချိန်အတွင်း မန္တလေးမြို့ခံများက မီနီအိုးဝေ၊ အိုးေ၀ လို့ခေါ်ပြီး ကျွန်တော်တို့အောက် သား တွေက တုပ်တုပ်လို့ခေါ်တဲ့ သုံးဘီးယာဉ်နဲ့ မြို့လုံးပတ်လည် လှည့်ခဲ့တယ်။ မင်းကွန်းအထိ လည်း သွားခဲ့တယ်။

မန္တလေးရောက်တော့ ကျွန်တော်တို့က နှုတ်ကျိုးနေတဲ့အတိုင်း တုပ်တုပ် လို့ပဲ ခေါ်တာ၊ ပြော တာ ပေါ့။ပထမနှစ်ရက်မှာတွေ့တဲ့အိုးဝေဆရာတွေကလည်း ရန်ကုန်က ဧည့်သည် တွေ မှန်းသိနေ တော့ တုပ်တုပ်လို့ခေါ်တာကိုလည်း ထူးထူးခြားခြား သဘောထားပုံမရဘူး။ တတိယမြောက်နေ့မှာ တွေ့ တဲ့ အိုးဝေဆရာလေးကတော့ တုပ်တုပ်လို့ ပြောသံကြားတာနဲ့ အိုးဝေလို့ ခေါ်ပါဆိုပြီး ပြော တယ်။ သူ့လေသံက စိတ်ဆိုးတဲ့အသံတော့မဟုတ်ပေမယ့် “ အိုးဝေ” လို့ ခေါ်တာ ပိုကောင်းတယ်ဆို တာကို အခိုင်အမာရပ်တည်ပြောနေတယ်ဆိုတာတော့ သိသာတယ်။

မီနီ အိုးေ၀ ဒါမှမဟုတ် အိုးေ၀ ဆိုတာက မန္တလေးမြို့မှာ သုံးဘီးယာဉ်ငယ်လေးတွေကို အငှားယာဉ် အဖြစ် စတင်အသုံးပြုနိုင်ဖို့ မိတ်ဆက်ခဲ့တဲ့ ကုမ္ပဏီ ကို အစွဲပြုပြီး ခေါ်တာလို့ဆိုတယ်။ အခု အချိန် မှာ အဲဒီ ကုမ္ပဏီ ပိုင်ယာဉ်မဟုတ်တဲ့ သုံးဘီးယာဉ်တွေကိုလည်း မြို့ခံတွေက မီနီအိုးဝေ၊ အိုးေ၀ ဆို ပြီး ပဲခေါ်ကြတယ်။

အိုးဝေဆရာလေးကမန္တလေးဇာတိတော့မဟုတ်ဘူး။ ဝန်ထမ်းဖြစ်တဲ့ မိဘတွေ မန္တလေးပြောင်းရာက နေ မန္တလေးမှာပဲ ကျောင်းတက်၊ကျောင်းထွက်၊ မန္တလေးသူနဲ့ အိမ်ထောင်ကျ တာပါ။ ဒါပေမဲ့ နေတာ နှစ်အစိတ်လောက်ရှိပြီဆိုတော့ မန္တလေးက ပဝတ္တိအရပ်ပေါ့။ အခု အိုးေ၀ ဆရာ လေးက “အိုးဝေ” အမည်ကို အရေးကြီးတဲ့ သဘောနဲ့ ပြောတာကြားလိုက် ရတော့ စကားပြောဖော်ကောင်း တစ်ယောက်တော့ရပြီလို့ တွေးလိုက်မိတယ်။

တက္ကစီ၊ အိုးဝေ၊ ဆိုက်ကား စတဲ့ အငှားယာဉ်မောင်းတွေက နေရာစုံရောက်၊ ခရီးသည်မျိုးစုံနဲ့ ကြုံ နေရတဲ့သူတွေဖြစ်တော့ သတင်းစုံတယ်၊ သူတို့ဆီက နိုင်ငံရေး၊စီးပွားရေး က အစ ဟိုတယ်၊ နိုက် ကလပ်၊ စားသောက်ဆိုင်၊ ဆေးရုံ၊ ဆေးခန်း အကြောင်းအလယ်၊ ဈေးချိုပြီး စားလို့ကောင်းတဲ့ လမ်း ဘေးဆိုင်အဆုံး သတင်းအချက်အလက်အစုံရနိုင်တယ်။ ယာဉ်မောင်းအများစုကလည်း ခရီးသည် နဲ့ စကားပြောချင်ကြပါတယ်။ လောကကြီးကို စိတ်ချဉ်ပေါက်ပြီး အင်းမလုပ်၊ အဲမလုပ် နေတဲ့သူ အတော်နည်းတယ်။

ဒါ့ကြောင့် ကျွန်တော်ကတော့ အစိုးရဝန်ထမ်းဘဝ၊ နိုင်ငံရေးရာထူးတာဝန်ထမ်းဆောင်ရတဲ့ ဘ၀ မှာတောင် ရန်ကုန်ရောက်တဲ့အခါတိုင်း အနည်းဆုံးတစ်ကြိမ်တော့ တက္ကစီ စီးဖြစ်အောင်စီးတယ်။ သူတို့ပြောတဲ့ နိုင်ငံရေး၊ စီးပွားရေးသတင်းတွေနားထောင်တယ်၊ ကိုယ့်ကို မှတ်မိတဲ့သူရှိသလို မသိတဲ့လူလည်းရှိတယ်။ မှတ်မိပေမယ့် မသိချင်ယောင်ဆောင်ပြီး အစိုးရအကြောင်းတွယ်သွား တယ်လို့ခံစားမိတာမျိုးလည်း ကြုံဖူးတယ်။

၂၀၁၉ နောက်ပိုင်းမှာတော့ တက္ကစီ စီးဖြစ်တဲ့အခါတိုင်း နိုင်ငံရေးပါတီတွေအပေါ် သဘော ထား အစိုးရအပေါ် သဘောထားတွေကို ပိုမေးဖြစ်တယ်။ ဖြေတဲ့သူရှိသလို မေးလိုက်တာနဲ့ တွန့်သွားတဲ့ သူလည်း ရှိတယ်။ဘာပဲဖြစ်ဖြစ် သူတို့ဆီက လက်တွေ့ဘဝနဲ့ အနီးစပ်ဆုံးအခြေအနေတွေကို ကြားရတာအမှန်ပဲ။

အခု အိုးေ၀ ဆရာလေးကတော့ မဆွတ်ခင်က ညွှတ်ချင်နေတဲ့သူပဲ။ မန္တလေးမြို့ထဲလမ်းတွေ အတော်ကောင်းသားဗျ လို့ စကားစလိုက်တာနဲ့ ၊ ဆရာရဲလွင် နဲ့ ဆရာကြီး ဆိုတာကို ရေလဲနဲ့ သုံးပြီး မြို့အတွက် ဘာတွေလုပ်ပေးခဲ့တယ်ဆိုတာကို ပြောတော့တာပဲ။ ဆရာကြီးလက်ထက်မှာ လမ်းကြားက အစ ကတ္တရာလမ်းဖြစ်သွားခဲ့တယ် လို့ ပြောတော့ ရန်ကုန် လမ်းတစ်ခြမ်းခင်း တဲ့ ခေတ်မှာ ကမ္ဗည်းမှတ်တမ်းကျောက်ပြားလေးတွေထောင်ထားတဲ့ လမ်းကြားလေးတွေအကြောင်း ပြန်တွေးမိတယ်။ မန္တလေးမြို့က ကတ္တရာခင်းထားတဲ့လမ်းကြားလေးတွေမှာတော့ ဘာဆိုင်းဘုတ် မှ မတွေ့ဘူး။ ဒါပေမဲ့ ကျွန်တော်စကားပြောခွင့်ရတဲ့သူတိုင်းကို လမ်းအကြောင်းမေးလိုက်တာနဲ့ အဖြေက အတူတူပဲ။ စားသုံးသူအသိအမှတ်ပြုမှုဆိုတာ ဆိုင်းဘုတ်နဲ့ မဆိုင်ဘူး၊ လက်ရာနဲ့ပဲ ဆိုင် တယ်ဆိုတဲ့ သဘောပေါ့လေ။

အိုးဝေဆရာလေးက ၂၀၁၆ – ၂၀၂၀ ကာလ မန္တလေးမြို့ခံတွေ မြို့စည်ပင်သာယာရေး အတွက် ဘာ တွေ ဝိုင်းကူပေးခဲ့တယ်ဆိုတာလည်း ပြောသဗျ၊ သူနဲ့ သူ့အပေါင်းအသင်းတွေတောင် မီးတိုင်လှူ ခဲ့သေးတယ်ဆိုပဲ။ ကျွန်တော်တို့မန္တလေးက အစွဲကြီးတယ်တယ်၊ ဈေးဆိုင် တောင်မှ ကိုယ့်မြို့ခံမှ တဲ့။ သူပြောတာ ဟုတ်လောက်တယ်။ ရန်ကုန်မှာ လက်ညှိုးထိုးမလွဲတွေ့ ရတဲ့ စူပါမားကက်နဲ့ ဆေး ဆိုင် အုပ်စု မန္တလေးမှာ တိုးပေါက်ပုံမရဘူး။ ဆရာကြီးက စေတနာလည်းမှန်၊ ကိုယ့်မြို့ခံလည်းဖြစ် ဆိုတော့ အားလုံး ဝိုင်းကူတာပေါ့တဲ့။ အိုးဝေဆရာလေးကတော့ ဝန်ကြီးချုပ် ဒေါက်တာဇော် ထက် မြို့တော်ဝန် ဆရာ ရဲ ကိုပဲ သိတဲ့ပုံပေါက်တယ်။

သူစကားပြောတာနားထောင်လိုက်တာနဲ့ သူ့ နိုင်ငံရေးတိမ်းညွှတ်မှုက ဘယ်မှာလဲ ဆိုတာ ထင် ရှား နေတယ်။ သူက ပါတီတွေအကြောင်းပြောတဲ့အခါ နာမည်တွေ မသုံးဘူး။ အစိမ်းနဲ့ ခွပ်ဒေါင်း လို့ ပဲ သုံးတယ်။ သူပထမဆုံးမဲပေးဖူးတာ ၂၀၁၀၊ အဲဒီအချိန်ကတော့ အစိမ်းကို ထည့်တယ်တဲ့။ ရွေးစရာလည်းမရှိဘူး၊ ပြီးတော့ ရွေးကောက်ပွဲလည်းမကြုံဖူးတော့ အစိမ်းကို မထည့်ဘူးဆိုတာ သိ သွားရင် ဘာဖြစ်မလဲ ဆိုပြီးကြောက်တာလည်း ပါတယ်တဲ့။

၂၀၁၅ ၊၂၀၂၀ မှာတော့ ခွပ်ဒေါင်းတဲ့။ ပါတီမူဝါဒတွေ ဘာတွေ လေ့လာတာတော့မဟုတ်ဘူး။ ဒေါ်အောင်ဆန်းစုကြည်ပါတီဆိုတာရယ်၊ အမတ်လောင်းကို သဘောကျတာရယ်ကြောင့်ထောက်ခံ တာပဲတဲ့။ဒီမြို့နယ်မှာနေလာတာနှစ်နှစ်ဆယ်ကျော်ပြီ၊ဘယ်သူဘာလဲဆိုတာ သိနေတာပဲ။ စာစောင် တွေ ဖတ်ဖို့မလိုပါဘူးတဲ့။

ကျွန်တော်စကားပြောခွင့်ရတဲ့ အခြေခံလူတန်းစားအများစုရဲ့ နိုင်ငံရေး အသိအမြင် ၊ အဆုံးအဖြတ်က ဖေ့စ်ဘွတ်ပေါ်ကလာတာလည်းမဟုတ်ဘူး။ သတင်းစာ ဂျာနယ် တွေကို အခြေခံ တာလည်းမဟုတ်ဘူး။ရုပ်သံမီဒီယာသတင်းတွေကြောင့်လည်းမဟုတ်ဘူး။သူတို့ရဲ့ နေ့စဉ် လူနေမှု ဘဝအတွေ့ အကြုံ ကနေ ဆုံးဖြတ်သွားတာပဲ။ သတင်းစာထဲ ဘယ်လောက် ရေး ရေး၊ရုပ်မြင်သံကြားက ဘယ်လောက်လွှင့်လွင့် သူတို့နေ့စဉ်ဘ၀ အဆင်မပြေရင် ဘာမှ မထူးဘူး ဆိုတာ ကျွန်တော်ကိုယ်တွေ့ကြုံခဲ့ဖူးပြီ။

အခုလည်း အိုးဝေဆရာလေးက ဘယ်သူကတော့ ရပ်ရေးရွာရေးကို တကယ်လုပ်ခဲ့တယ်၊ ဘယ်သူ ကတော့ အခမ်းအနားရှိမှ တိုက်ပုံတကားကားနဲ့လာ၊ ရှေ့ဆုံးတန်းမှာ ထိုင်လက်ခုပ်တီး တယ်၊ ဘယ်သူက ရန်ပုံငွေ တစ်ကျပ်ရရင် ငါးမူးအိတ်ကပ်ထဲထည့်တယ် စသည်ဖြင့် သူတို့ မြို့နယ် က အမတ်လောင်းတွေ၊ ပါတီတွေအကြောင်း သရုပ်ခွဲပြနေတယ်။

ကျွန်တော်တို့က အိုးဝေကို တစ်နေ့စာ ငှားတာဆိုတော့ ကြားခဲ့ရတာတွေက အများကြီးပါပဲ။ နိုင်ငံ ရေးအကြောင်းပါသလို ကျွန်တော်တို့ သွားရောက်လေ့လာတဲ့နေရာတွေနဲ့ပတ်သက်ပြီး သူသိ သလောက်ပြောတာလည်း ကြားရတယ်။ ညဘက်ရောက်ရင် လုယက်မှုတွေပေါတဲ့ အကြောင်း ပြောသလို စစ်လည်းစစ်၊ ရစ်လည်း ရစ်တဲ့ ပုံပြင်တွေလည်း ပြောပြတယ်။ သူကတော့ ညနေ ခြောက်နာရီကျော်ရင် အိမ်ပြန်တယ်၊မနက်ဆိုရင်လည်း ခြောက်နာရီလောက်မှထွက်တော့တယ် တဲ့။ အိုးဝေဆရာလေးက အရင်က ဆိုင်ကယ်ကယ်ရီ၊ နောက်မှ အိုးဝေပြောင်းမောင်းတာဆိုတာ့ ခေတ်အလိုက် ဝင်ငွေ၊ထွက်ငွေ၊ ဘဝလုံခြုံမှုအကြောင်းကောင်းကောင်း နှိုင်းယှဉ်ပြောတတ် တယ်။ အခု အိုးဝေဆွဲရတာ ခေတ်ကောင်းလားလို့မေးတော့ “ဆရာကလည်း မေးစရာလား” တဲ့။

ခရီးဆုံးလို့ ဟိုတယ်ပြန်ရောက်တော့ ကားခရှင်းရင်း သွားချင်တဲ့နေရာတွေကို စိတ်ရှည် ရှည်၊ ဘေးရန်ကင်းကင်းနဲ့ ပို့ပေးတဲ့အတွက် ကျေးဇူးတင်ကြောင်းပြောတယ်။ ပြီးတော့ ဆရာရဲလွင် ပရိသတ်ကြီး၊ နောက်လည်း ဆုံဦးမယ်ဗျာလို့နှုတ်ဆက်စကားပြောတယ်။ ကျွန်တော့်နှုတ်ဆက် စကား ကြားတော့ အိုးေ၀ ဆရာလေးက “ ဆရာ့ကို ပြောဖို့ကျန်သွားလို့ဗျ၊ ဆရာကြီး က ကျွန်တော်တို့ နဲ့ တစ်ရပ်တည်း၊ အနောက်ပြင်မှာပဲနေတာ” လို့ ပြုံးပြုံးကြီးပြောပြီး ထွက်သွားလေရဲ့။

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: