မော်တင်စွန်း (၈)

မော်တင်စွန်းရောက်ပြီး ပထမနေ့မှာ ဘုရားပတ်ဝန်းကျင်နဲ့ ငွေတောင်ကမ်းခြေကို သွားတယ်။ ဒုတိယနေ့မှာ မော်တင်စွန်းကနေ ကျောက်ကလပ် ကမ်းခြေကို ဆိုင်ကယ်၊ စက်လှေ၊ ကား သုံးဆင့်စီးပြီးသွားတယ်။ ကျောက်ကလပ်ကို သွားမယ်ဆိုရင် ရေတက်ရေကျ အချိန်ကို မေးထား ဖို့လိုတယ်။ ကျောက်ကလပ်ကမ်းခြေက ဒီရေကျချိန်မှ ကမ်းခြေကို ဆင်းလို့ ဓာတ်ပုံရိုက်လို့ ရ တယ်။ ကျွန်တော်တို့ သွားတဲ့ရက်က ၁၁ နာရီပတ်ဝန်းကျင် ရေစတက်မယ်လို့သိရတဲ့ အတွက် မော်တင်စွန်းကနေ မနက် ၇နာရီထွက်ခဲ့တယ်။ ခရီးသွားချိန်က မော်တင်စွန်းကနေ ကျောက် ကလပ်ထိ နှစ်နာရီ နီးပါးကြာနိုင်တယ်။

ဆိုင်ကယ်က ကမ်းနားလမ်းအတိုင်း ကံချိုင် ရွာကတဆင့်သွားတယ်။ ကံချိုင်ရွာက ရေလုပ်ငန်း လုပ်တဲ့ ရွာကြီး။ ရွာကနေ ပင်လယ်ကမ်းခြေဘက်ဆင်းလိုက်ရင် ကျား (၁) ၊ ကျား (၂ ) ၊ ကျား (၃) ဆိုတဲ့ ငါးဖမ်းလှေဆိပ်တွေရှိတယ်။ အဲဒီလှေဆိပ်တွေမှာ ငါး၊ပုစွန်ဒိုင်တွေလည်း ရှိတယ်။ ကံချိုင် – ဟိုင်းကြီးကျွန်းတံတားအထိ လမ်းက ကတ္တရာလမ်းပေမယ့် ရွာတွေကြားက ဖြတ်သွားရတော့ လမ်း ကျဉ်းပြီး အကွေ့အကောက်များတယ်။ ကိုယ့်ကားနဲ့ ကိုယ် သွားမယ်ဆိုရင်တော့ ကျောက်ချောင်း လမ်းခွဲကို ပြန်သွားပြီး ပုသိမ်၊ ဟိုင်းကြီးကျွန်းကားလမ်းအတိုင်း သွားတာကောင်းတယ်။ အဲဒီလမ်းက ကံချိုင်လမ်းနဲ့ ဟိုင်းကြီးကျွန်းတံတားမှာ ပြန်ဆုံတာပဲ။

ဟိုင်းကြီးကျွန်းတံတားရှိတဲ့နေရာက ခမောက်မော်ဆိပ်ကမ်းဖြစ်တော့ တံတားပတ်ဝန်းကျင်မှာ “ မြတ် မော်တင်စွန်းဘုရားပွဲတော်သို့” ဆိုင်းဘုတ်နဲ့ သာသနာ့အလံတွေထောင်ထားတဲ့ ဘုရား ဖူး ရေယာဉ်တွေကို တွေ့ရတယ်။ ကျွန်တော်တို့ ဆိုင်ကယ်ဖြတ်နေတုန်း ဘုရားဖူးလှေတစ်စီး ဝင်လာ တာလည်း တွေ့လိုက်ရတယ်။ ဟိုင်းကြီးကျွန်းတံတားဖြတ်ပြီးတာနဲ့ ဟိုင်းကြီးကျွန်းမြို့ကို ရောက် တာမဟုတ်ဘူး။ ဟိုင်းကြီးကျွန်းပေါ်မှာ ကျေးရွာခုနှစ်ရွာရှိပြီး ဟိုင်းကြီးမြို့က ငဝန်မြစ်ဘက်အခြမ်း မှာ ရှိတာဆိုတော့ ကျွန်းကိုဖြတ်ပြီး ဆိုင်ကယ်စီးသွားရတဲ့သဘောပဲ။ တံတားကိုဖြတ်ပြီးတော့ စံပြ၊ အဏ္ဏဝါ စတဲ့ရွာတွေကို ဖြတ်ပြီးတဲ့အခါ ဟိုင်းကြီးကျွန်းမြို့ကို ရောက်တယ်။

ဟိုင်းကြီးကျွန်းမြို့အဝင်မရောက်မီ လမ်းဘယ်ဘက်မှာ ခြံဝင်းခတ်ထားတဲ့နေရာတစ်ခုရှိတယ်။ အဲဒီ ခြံဝင်းနေရာမှာ “ သမိုင်းဝင်ဟိုင်းကြီးကျွန်းတိုက်ပွဲနေရာ” ဆိုတဲ့ ခေါင်းစဉ်တပ်ပြီး “ ကျူးကျော်သူ အင်္ဂလိပ်လူမျိုး Captain Southby ၊ မစ္စတာဟုတ်၊ မစ္စတာ ဘရစ်နှင့် အခြားနောက်လိုက်နောက်ပါ တို့အား အလောင်းမင်းတရားကြီး၏ တပ်မတော်မှာ အာမေးနီးယန်း လူမျိုးမင်းရဲကောင်းပုံဘွဲ့ခံ Antonio၊ ကလန်ပွားနှင့် မြင်းစီးသိင်္ခနုရာတို့မှ ၁၇၅၉ ခု၊ အောက်တိုဘာလ ၆ ရက်နေ့တွင် တိုင်း ပြည်၏ နောင်ရေးအတွက် တိုက်ခိုက်သတ်ဖြတ်ခဲ့သည့် သမိုင်းဝင်တိုက်ပွဲဖြစ်စဉ်နေရာ” လို့ ရေး ထားတဲ့ဆိုင်းဘုတ်ရှိတယ်။

ကုန်းဘောင်ဆက်မဟာရာဇဝင်တော်ကြီးအဆိုအရတော့ဟိုင်းကြီးကျွန်းဖြစ်စဉ်က မြန်မာ- အင်္ဂလိပ် စစ်တပ်တွေ ရင်ဆိုင်တိုက်တဲ့ တိုက်ပွဲမဟုတ်ပါဘူး။ ဟိုင်းကြီး ကျွန်း မှာ ဖွင့်ထားတဲ့ အင်္ဂလိပ် ကုမ္ပဏီက အလောင်းဘုရားနဲ့ စစ်ဖြစ်နေတဲ့ ဟံသာဝတီဘုရင်ကို လက်နက်ခဲယမ်းအကူအညီ ပေးတယ်ဆိုတဲ့ သတင်းအရ မင်းရဲကောင်းပုံ ခေါင်းဆောင်တဲ့ မြန်မာ စစ်သည် တစ်ရာကျော်ကို လွှတ်ပြီးရုံးကိုဖျက်ဆီး၊အင်္ဂလိပ်ကုန်သည်အဖွဲ့တွေကိုဖမ်းခိုင်းလိုက်တာပါ။မဟာရာဇဝင်တော်ကြီးမှာတော့ အင်္ဂလိပ်သေတဲ့၊ ဖမ်းမိတဲ့စာရင်းမပါဘူး။ ရွှေ၊ ငွေ၊ အဝတ် အထည်နဲ့ လက်နက်ခဲယမ်း တွေကို သမ္ဗန်ခုနစ်စီးနဲ့ ပြန်သယ်လာခဲ့တယ် ၊ အင်္ဂလိပ်သဘောၤနဲ့ လှေတွေ ကျောက်ကြိုး ဖြုတ်ပြီး ထွက်ပြေးသွားတယ်လို့ပဲပါတယ်။

ဟိုင်းကြီးကျွန်းသဘောၤဆိပ်ရောက်တော့ စက်လှေငှား ငဝန်မြစ်ဝကို ဖြတ်ပြီး အလယ်ကျွန်း ချောင်းဝရွာကို စက်လှေနဲ့ ကူးတယ်။ စက်လှေခ လေးသောင်းပေးရတယ်။ စက်လှေက အကြီးကြီး၊ ခရီးသည်ကနှစ်ယောက်ထဲ၊လူများများနဲ့သွားမှတန်မှာပါ။စက်လှေက ၄၅ မိနစ် စီးရတယ်။ ချောင်း၀ ရောက်တော့ ကျောက်ကလပ်ကို သွားဖို့ ကားငှားရတယ်။ လူများရင်တော့ လိုက်ထရပ်ငှားပေါ့။ ကျွန်တော်တို့ ကတော့ နှစ်ယောက်ထဲဆိုတော့ စက်လှေဆရာချိတ်ပေးတဲ့ ဗင်ကားလေးနဲ့ သွား တယ်။ ကား ခ လည်း လေးသောင်းပဲ။

တကယ်တော့ ကျောက်ကလပ်ကို လည်ပတ်ဖို့ အကောင်းဆုံးအချိန်က စက်တင်ဘာ၊ အောက်တို ဘာ လတွေဖြစ်ပါတယ်။ အဲဒီအချိန်သွားရင် ကျောက်ကလပ် ကမ်းခြေကျောက်သားပြင်တွေပေါ်မှာ ရေညှိစိမ်းတွေရှိနေတဲ့အတွက် ရှုခင်းအလွန်လှပါတယ်။ အွန်လိုင်းပေါ်မှာတွေ့နေရတဲ့ အစိမ်းရောင် ကျောက်ကလပ်ကမ်းခြေရှုခင်းပုံတွေက အဲဒီအချိန်ကာလမှာရိုက်ထားတာတွေဖြစ်ပါတယ်။

နောက်ပြီးတော့ ကျောက်ကလပ်ကိုပဲ တိုက်ရိုက်လာချင်တယ်ဆိုရင်တော့ အနီးဆုံးလမ်းက ရန်ကုန်- လပွတ္တာကားလမ်းအတိုင်းလာဖို့ဖြစ်ပါတယ်။ ရန်ကုန် – လပွတ္တာက ၁၀၅ မိုင်ရှိတယ်။ လပွတ္တာကနေ သက္ကသောင်မြစ်ကို ဇက်နဲ့ ကူးပြီး ကိုယ့်ကားနဲ့ ကိုယ် ကျောက်ကလပ်အထိ လာ လို့ရတယ်။ ဒါပေမယ့် ဇက်က တစ်နေ့နှစ်ကြိမ်ပဲရှိတယ်။ ပြီးတော့ ဇက်ဆိပ်ကနေ ချောင်း၀ ၊ ကျောက်ကလပ် ကားလမ်းပေါ်ရောက်တဲ့အထိ လာရတဲ့လမ်းက ကျောက်ကြမ်းလမ်း၊ မိုင် ၃၀ လောက် ကို သုံးနာရီလောက်မောင်းရတဲ့လမ်းဆိုတော့ ကိုယ့်ကားနဲ့ကိုယ်လာလို့ မကောင်းဘူး။

ကျောက်ကလပ်ရှုခင်းကို ညအိပ်ညနေ နေပြီး ရိုက်ချင်တဲ့သူတွေကတော့ ခရီးသည်တင်ဘတ်စ် ကားနဲ့ လပွတ္တာကိုလာ၊ အဲဒီကနေ တုတ်တုတ်နဲ့ ဇက်ဆိပ်ကို ဆင်း၊ ဒီဘက်ကမ်းကို စက်လှေ နဲ့ ကူးပြီး ဆိုင်ကယ် သို့မဟုတ် ကားငှား၊ ကျောက်ကလပ်နဲ့ နီးတဲ့ မကျည်းချိုင်၊ အစင်းချိုင်တို့ မှာ အိမ်ငှား၊ နှစ်ရက်၊ သုံးရက်နေကြတယ်။ တချို့ကတော့ ကိုယ့်ကားနဲ့ လပွတ္တာအထိလာ၊ ကားကို လပွတ္တာမှာထားပြီး ဒီဘက်ကို ခရီးဆက်ကြတယ်။

ကားငှား၊ အိမ်ငှားမယ်ဆိုရင် မကျည်းချိုင်၊ အစင်းချိုင်က ဒေသခံတွေကို ဆက်သွယ်ရမယ်။ သူ တို့က ဇက်ဆိပ်အထိ လာကြိုပေးတယ်။ ကိုယ့်ကားကို ဇက်ဆိပ်မှာထားမယ်ဆိုရင်လည်း စိတ်ချတဲ့ နေရာမှာ အပ်လို့ရအောင် စီစဉ်ပေးတယ်။ ကားညအိပ်ခတော့နည်းနည်းပေးရမှာပေါ့။ အိမ်က တော့ အိမ်အရွယ်အစား၊ လူအနည်းအများပေါ်မူတည်ပြီး တစ်ည နှစ်သောင်းကနေ ငါးသောင်း လောက် အထိ ရှိတယ်ပြောတယ်။ ကျွန်တော်တွေ့ခဲ့တဲ့ တည်းခိုအိမ်တွေကတော့ အုတ်တစ်ထပ် တိုက်လေးတွေပါ။ ကျွန်တော်စီးခဲ့တဲ့ ကားသမား ကိုစိုးလှိုင် ( ဖုန်း ၀၉ ၇၇၃၇၇၃၅၇၅ ၊ ၀၉ ၄၅၃ ၄၄၄ ၀၄၀ ) ကို ဆက်သွယ်ရင်လည်း သူစီစဉ်ပေးလို့ရပါတယ်။

တကယ်တော့ ကျောက်ကလပ်ကမ်းခြေက နောက် ရေညှိစိမ်းတွေရှိတဲ့ကာလ အရုဏ်တက်ချိန်၊ နေ ဝင်ဆည်းဆာချိန်တွေရိုက်မှ လှတာ။ နောက်ပြီး ကျောက်ကလပ်ရှိတဲ့အလယ်ကျွန်းမှာက ကျောက် ကလပ်အပြင် ဓားသွေးကျောက်ကမ်းခြေ၊ ထိပ်စွန်း၊ ရှင်စောပုဘုရားကမ်းခြေ တွေကိုလည် ပတ် လို့ရသေးတယ်။ ဒါ့အပြင် ငါးဖမ်းလုပ်ငန်း၊ ကျောက်မီးဖို လုပ်ငန်းစတဲ့ဒေသထွက်ကုန်လုပ်ငန်းတွေ ကိုလည်း လေ့လာလို့ရသေးတယ်။ ဒ့ါကြောင့် နှစ်ရက်၊ သုံးရက်နေပြီး လေ့လာကြည့်ရှု ဓာတ်ပုံ ရိုက် နိုင်ရင် အကောင်းဆုံးပဲ။ ဓာတ်ပုံဆရာတွေက အဲဒီလို လာလေ့ရှိသလို တချို့ လူငယ်လေးတွေ ကလည်း အုပ်စုနဲ့ ကိုယ်ပိုင်ဓာတ်ပုံဆရာခေါ်ပြီး ဓာတ်ပုံလာရိုက်တာလည်း ရှိတယ်။

သတိထားရ မှာကတော့ အဲဒီလိုလာမယ်ဆိုရင် ဒေသခံတွေနဲ့ ဆက်သွယ်လုပ်ဆောင်ဖို့ လို ပါတယ်။ ဒေသခံ မဟုတ်တဲ့ ပုဂ္ဂိုလ်တချို့က ဖေ့စ်ဘွတ်ပေါ်မှာ ပုံလှလှလေးတွေတင်ထား၊ လာ ဆက်သွယ်တဲ့ သူ တွေက မတန်တဆငွေတောင်းပြီး စီစဉ်ပေးကြတယ်လို့ ဆိုတယ်။ ကျွန်တော် တို့ နေ့လယ်စာ စားတဲ့ ထမင်းဆိုင်ကဆိုရင် ရန်ကုန်က ကောင်မလေး သုံးယောက်၊ ကောင်လေး တစ်ယောက်ပါတဲ့အဖွဲ့ကို နှစ်ညအိပ်သုံးရက် ခရီးအတွက် ၁၃ သိန်းနဲ့ရိုက်သွားတဲ့သူ အကြောင်း ပြော ပြတယ်။ ၁၃ သိန်းဆိုတာက ကျွန်းပေါ်သွားဖို့ တည်းဖို့ စားဖို့ နဲ့ ဓာတ်ပုံရိုက်ပေးဖို့ပဲ။ ရန်ကုန် ကနေ လပွတ္တာ အထိ ကိုယ့်အစီအစဉ်နဲ့ ကိုယ်လာရတာ။ အဲဒီဓာတ်ပုံဆရာအမည်ခံသူ ရိုက်ချက် ကတော့သူ့မှာ ကင်မရာကေင်းကောင်းမရှိလို့ ဧည့်သည်တွေက ယူလာရတယ်။

ကျွန်တော်ကတော့ ဒီခရီးစဉ်က လမ်းခရီးအခြေအနေလေ့လာတဲ့ခရီးပဲဖြစ်တဲ့အတွက် ကျောက် ကလပ်ကမ်းခြေ၊ ဓားသွေးကျောက်ကမ်းခြေ နဲ့ ရှင်စောပုဘုရားကမ်းခြေကိုပဲ ရောက်ဖူးတယ် ဆိုရုံ သွားကြည့်ပြီး မကျည်းချိုင်မှာနေ့လယ်စားစားပြီး ပြန်ထွက်ခဲ့တာ မော်တင်စွန်းကို ညနေ နှစ်နာရီ မှာ ပြန်ရောက်တယ်။

ကျောက်ကလပ်ခရီးစဉ်ပြီးတော့ မော်တင်စွန်းမှာ လည်ပတ်ကြည့်ရှုဖို့နေရာကုန်ပြီဖြစ်တဲ့အတွက် ရန်ကုန်ပြန်ဖို့ စီစဉ်ပါတယ်။

ဆက်လက်ဖော်ပြပါ့မယ်။