ထွေအုပ်နဲ့ နိုင်ငံရေးပါတီ

အင်တာနက်ပေါ်မှာ ချောင်းဦးမြို့နယ်အထွေထွေအုပ်ချုပ်ရေးဦးစီးဌာနက ရပ်ကွက်၊ ကျေးရွာ အုပ်စု အုပ်ချုပ်ရေးမှူးတွေကို ညွှန်ကြား တဲ့စာတစ်စောင်ကို တွေ့ရတယ်။

စာပါ အကြောင်းအရာကတော့ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ လမ်းညွှန်ချက်အရ အမျိုးသား ဒီမိုကရေစီအဖွဲ့ချုပ် မုံရွာခရိုင် အမျိုးသမီးလုပ်ငန်းကော်မတီက အသက် ၁၈ နှစ် ပြည့်သူတိုင်း မဲပေးခွင့်ရအောင် မဲစာရင်းဆောင်ရွက်တဲ့အခါ ရပ်ကွက်၊ ကျေးရွာအုပ်စု အုပ်ချုပ် ရေးမှူးတွေက လိုအပ်တာတွေကူညီဆောင်ရွက်ပေးဖို့ အကြောင်းကြားတာဖြစ်ပါတယ်။ ဒီစာ ကို မုံရွာခရိုင်ထွေအုပ်ရဲ့ ၂၀၁၉ သြဂုတ်လ ၉ ရက်နေ့စာကို ညွှန်းပြီး ၂၀၁၉ သြဂုတ်လ ၁၉ ရက် နေ့မှာ အုပ်ချုပ်ရေးမှူး အောင်ဘော် ( ပ/၄၄၈၄) က လက်မှတ်ထိုး ထပ်ဆင့် ထုတ်ပြန်ခဲ့တာဖြစ်ပါတယ်။

ဒီညွှန်ကြားချက်က အစစ်အမှန်ဆိုရင် အောက်ပါအချက်တွေကို စဉ်းစားသုံးသပ်ဖို့လိုလာ ပါတယ်-

၁။ ဒေါ်အောင်ဆန်းစုကြည်ဟာ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီး တာဝန်ကို ထမ်း ဆောင်နေသူဖြစ်ပါတယ်။ ဖွဲ့စည်းပုံအခြေခံဥပဒေ ပုဒ်မ ၂၃၂ (ဋ) အရ ပြည်ထောင်စု ဝန်ကြီး အဖြစ် ခန့်အပ်တာဝန်ပေးချိန်ကစပြီး မိမိပါတီရဲ့ လုပ်ငန်းတာဝန်တွေမှာ ပါဝင်ဆောင်ရွက်လို့ မရ ပါဘူး။ ဒီစာထဲမှာ ဒေါ်အောင်ဆန်းစုကြည်ရဲ့ လမ်းညွှန်ချက်အရ ပါတီအဖွဲ့အစည်းတစ်ခုက လိုက်နာဆောင်ရွက်တယ်လို့ ဖော်ပြထားတဲ့အတွက် လမ်းညွှန်ချက်ပေးခြင်းဟာ ပါတီလုပ်ငန်း တာဝန်ကို ပါဝင်ဆောင်ရွက်တာဟုတ် ၊ မဟုတ်။

၂။ အထွေထွေအုပ်ချုပ်ရေးဦးစီးဌာနဆိုတာ နိုင်ငံ့ဝန်ထမ်းအဖွဲ့အစည်းဖြစ်ပါတယ်။ ဒါ့ကြောင့် ဌာ အနေနဲ့ရော၊ ဝန်ထမ်းတစ်ဦးချင်းအနေနဲ့ ပါ နိုင်ငံရေးပါတီတစ်ခုရဲ့ လုပ်ငန်းတွေမှာ ပါဝင် ပတ် သက်လို့မရပါဘူး။ နိုင်ငံ့ဝန်ထမ်းဥပဒေ ( ၂၀၁၈ ပြင်ဆင်ပြီး) ပုဒ်မ ၁၀ (ဆ) မှာ ဝန်ထမ်းတွေဟာ ပါတီနိုင်ငံရေး ကင်းရှင်းရမယ်လို့ ပြဋ္ဌာန်းထားပါတယ်။ ဒ့ါကြောင့် ပါတီတစ်ခုရဲ့ မဲစာရင်းကောက် ယူရေးလုပ်ငန်းကို ကူညီဖို့အတွက် ရပ်ကွက်၊ ကျေးရွာအုပ်စု အုပ်ချုပ်ရေးမှူးတွေကို အကြောင်း ကြားတာဟာ အုပ်ချုပ်ရေးအဖွဲ့အစည်းနဲ့ ပါတီလုပ်ငန်း ဆက်စပ်နေသလို ဖြစ်၊ မဖြစ်။

၃။ နောက်တစ်ချက်က မဲစာရင်းကောက်တယ်ဆိုတာ ရွေးကောက်ပွဲကော်မရှင်အဆင့်ဆင့်ရဲ့ လုပ် ငန်းတာဝန်ဖြစ်ပါတယ်။ နိုင်ငံရေးပါတီတွေ၊ မဲဆန္ဒရှင်တွေရဲ့ တာဝန်က ရွေးကောက်ပွဲမတိုင်မီ မဲစာ ရင်းတွေ ကြိုတင်ကပ်ထားတဲ့အခါ မဲမပေးသင့်သူတွေ မဲစာရင်းမှာပါနေသလား၊ မဲပေးခွင့်ရှိသူတွေ မဲစာရင်းမှာမပါဘဲ ကျန်ခဲ့သလားဆိုတာ စိစစ်ဖို့၊ လိုအပ်ရင် ပြင်ဆင်ပေးရန် တင်ပြဖို့ ဖြစ်ပါတယ်။ ဒ့ါကြောင့် ပါတီတစ်ခုက မဲစာရင်း ပြုစုတယ်ဆိုရင် ရွေးကောက်ပွဲကော်မရှင်ရဲ့ လုပ်ငန်းတာဝန်ကို ဝင်ရောက်စွက်ဖက်ရာ ရောက် ၊ မရောက်။

အထက်ပါအချက်များအရ ဒီညွှန်ကြားချက်ဟာ ၂၀၂၀ ရွေးကောက်ပွဲအတွက် ကြိုတင်ပြင်ဆင်မှုတွေ အပေါ်မှာရော၊ နိုင်ငံတော်အတိုင်ပင်ခံပုဂ္ဂိုလ်နဲ့ အထွေထွေ အုပ်ချုပ်ရေးဦးစီးဌာနအပေါ်မှာရော မေးခွန်းထုတ်စရာတွေအများကြီးပေါ်လာနိုင်တဲ့ ညွှန်ကြားချက်ဖြစ်နေပါတယ်။

ဒါ့ကြောင့် အထွေထွေအုပ်ချုပ်ရေးဦးစီးဌာနကို ကြီးကြပ်ကွပ်ကဲရတဲ့ ပြည်ထောင်စု အစိုးရအဖွဲ့ရုံး ဝန်ကြီးဌာနအနေနဲ့ ဒီရုံးစာဟာ အတုလား၊ အစစ်လားဆိုတာကို အမြန်ဆုံး စိစစ်ဖြေရှင်းသင့် ပါ တယ်။

ဒါ့အပြင် နိုင်ငံရေးပါတီတွေအနေနဲ့လည်း ပြည်ထောင်စုအစိုးရအဖွဲ့ရုံး ဝန်ကြီးဌာနကို လွှတ်တော်ကတဆင့် မေးခွန်း မေး သင့်ရင် မေးရပါလိမ့်မယ်။